თბილისის იბერია 1999-ის მომავალი მეტოქე უეფას კონფერენს ლიგაზე, შვედური მიალბი, ევროპულ დაპირისპირებამდე მძიმე სატურნირო ვითარებაში იმყოფება.
Allsvenskan-ის მორიგ ტურში მიალბი სტუმრად ვასტერასთან 0:1 დამარცხდა. მატჩის ერთადერთი გოლი 21-ე წუთზე აქსელ ტაონსამ გაიტანა.
შეხვედრა მსაჯის სკანდალური გადაწყვეტილებით აღინიშნა. მატჩის დასრულებამდე 20 წუთით ადრე, უილიამ გრანატმა კუთხურის შემდეგ ანგარიში გაათანაბრა, თუმცა მთავარმა არბიტრმა, ფრედრიკ კლიტემ გოლი გააუქმა და მეკარე ანტონ ფაგერშტრიომზე ჯარიმა დააფიქსირა.
განმეორებითმა კადრებმა აჩვენა, რომ მეკარემ წონასწორობა საკუთარი ქმედების გამო დაკარგა, რის გამოც მიალბის მთავარმა მწვრთნელმა, ანდრეას ბრენშტრიომმა და გუნდის ბომბარდირმა, იაკობ ბერგსტრიომმა მსაჯის გადაწყვეტილება ღიად გააკრიტიკეს.
ახალი მთავარი მწვრთნელის, ანდრეას ბრენშტრიომის ხელმძღვანელობით მიალბის შვედეთის ჩემპიონატში ჯერ გამარჯვება არ მოუპოვებია.
გუნდი Allsvenskan-ში 24 ტურის შემდეგ 23 ქულით მე-12 ადგილზეა და გავარდნის ზონასთან ახლოს იმყოფება. ბოლო ხუთ შეხვედრაში შვედურ კლუბს 3 მარცხი, 1 ფრე და მხოლოდ 1 გამარჯვება აქვს (კონფერენს ლიგაზე ინტერ ესკალდესთან).
შეგახსენებთ, რომ იბერია 1999 კონფერენს ლიგის მომდევნო მატჩს 22 ოქტომბერს, 20:45 საათზე, მიალბის წინააღმდეგ სახლში გამართავს!
ისტორიული შეხვედრის ბილეთების გაყიდვა ოფიციალურად დაიწყო და მათი შეძენა შესაძლებელია ამ ბმულზე.
