ინფანტინო: "მსოფლიო საკლუბო მაგარი ტურნირია - ჰალანდს და აკანჯის მსოფლიო ჩემპიონობის შანსს ვაძლევთ"

ფიფას პრეზიდენტმა განახლებულ მსოფლიო საკლუბო ჩემპიონატზე ისაუბრა, რომელიც 2025-ს ზაფხულში გაიმართება.

ტურნირი 15 ივნისიდან 13 ივლისის ჩათვლით აშშ-ში ჩატარდება.

იტალიის ფეხბურთის ფედერაციის წარმომადგენლებთან შეხვედრაზე, ინფანტინოს ჰკითხეს, რას ფიქრობს ის ამ ტურნირზე, იმის ფონზე, რომ ფეხბურთელები გადატვირთულ კალენდარზე გამოთქვამენ უკმაყოფილებას.

„მე ვფიქრობ, რომ ეს გადასარევი ტურნირია, რომელშიც ორი იტალიური კლუბი - ინტერი და იუვენტუსიც მიიღებენ მონაწილეობას. მათ გარდა, ვიხილავთ გუნდებს მთელი მსოფლიოდან, რომელთაც აქამდე ასეთ დიდ სცენაზე თავის წარმოჩენის შანსი არ ეძლეოდათ.

ტურნირი ერთი თვე გაგრძელდება და ფიფას კონფერედაციათა თასს შეცვლის, ეს ბევრად უფრო ლოგიკური ფორმატია. ფიფა მსოფლიოში ყველა მატჩის მხოლოდ 1%-ს აორგანიზებს. იქნებ, ჯერ კრიტიკა დანარჩენი 99%-დან დაგეწყოთ?

ჩვენი ტურნირები მსოფლიოში დიდ ინტერესს იწვევს. გარდა ამისა, ვაძლევთ მსოფლიო ჩემპიონატზე თამაშის და მისი მოგების შანსს ისეთ ფეხბურთელებს, რომლებიც ამას ნაკრებთან ერთად ვერ ახერხებენ. 

ახლახანს ვესაუბრე ჰალანდს და აკანჯის. დიდებული ფეხბურთელები არიან, რომლებსაც ახლა მსოფლიო ჩემპიონატის მოგების შანსი უჩნდებათ - თუ თავიანთი ქვეყნის ნაკრებთან ერთად არა, კლუბთან მაინც. ეს იგივე მსოფლიო იქნება - ოღონდ კლუბებისთვის და ამ კლუბების ქვეყნებისთვის." - აღნიშნა ინფანტინომ.