ნორვეგიის ნაკრების მთავარი მწვრთნელი, სტოლე სოლბაკენი, მედიაში გავრცელებულმა ჭორებმა გააბრაზა.
საუბარია ხმებზე, თითქოს მანჩესტერ სიტიმ ნორვეგიელებს მოსთხოვა, ერლინგ ჰოლანდი პრესკონფერენციაზე არ გამოეყვანათ, რათა მას ინგლისური კლუბის სკანდალურ ვერდიქტზე შეკითხვები არ მიეღო.
პორტუგალიასთან მატჩის წინ ჰოლანდი მედიასთან უნდა გამოჩენილიყო, თუმცა ის მოულოდნელად თანაგუნდელებით ჩაანაცვლეს, რამაც ეჭვები გააჩინა.
სოლბაკენმა ეს ბრალდებები მკაცრად უარყო:
ეს არის ტყუილი, რომელიც ჩემს პატიოსნებას ეჭვქვეშ აყენებს. მანჩესტერ სიტის წარმომადგენლებთან მედიის თემაზე მას შემდეგ არ მისაუბრია, რაც ერლინგი დორტმუნდიდან გადავიდა. ეს გადაწყვეტილება თავად მივიღე, რათა ფეხბურთელი ზედმეტი წნეხისგან გამეთავისუფლებინა.
მიუხედავად ატეხილი ხმაურისა, ჰოლანდმა პორტუგალიასთან შეხვედრაში გოლი გაიტანა, თუმცა ნორვეგია მაინც 1:2 დამარცხდა.
