ინსტაგრამის ბოლო განახლებამ, რომელიც ბოტებისა და არააქტიური მომხმარებლების წაშლას გულისხმობდა, რამდენიმე მსხვილ ანგარიშს დიდი რაოდენობით გამომწერები დააკარგვინა.
მიუხედავად იმისა, რომ UFC 328-ის წინ ინტერესი პიკზეა, გავრცელებული ინფორმაციით, ორგანიზაციის კონტენტი დაახლოებით 480,000 გამომწერს აღარ მიუვა.
როგორც Jed I. Goodman სოციალურ ქსელ X-ზე წერს, UFC-ის ოფიციალურმა გვერდმა 398,000-ზე მეტი გამომწერი დაკარგა, ხოლო დანა უაითის პირადი ანგარიშიდან 81,000-ზე მეტი მომხმარებელი გაქრა. მიზეზი პლატფორმის მიერ ყალბი და არააქტიური ანგარიშების ფილტრაცია გახდა.
აღმოჩნდა, რომ ეს დარტყმა მხოლოდ UFC-ის ხელმძღვანელობაზე არ ასახულა. MMA-ის სამყაროდან ყველაზე დიდი კლება ხაბიბ ნურმაგომედოვის პროფილზე დაფიქსირდა, საიდანაც 570,000-ზე მეტი გამომწერი გაქრა. მნიშვნელოვანი დანაკარგი აქვთ სხვა ვარსკვლავებსაც: ისლამ მახაჩევმა 75,000 გამომწერი დაკარგა, ხოლო ჯონ ჯონსმა - დაახლოებით 74,700.
შედარებისთვის, ყველაზე მასშტაბური კლება თავად ინსტაგრამის ოფიციალურ გვერდს შეეხო, რომელმაც თითქმის 11 მილიონი გამომწერი დაკარგა.
