პედი პიმბლეტს ილია თოფურიასთან ბრძოლა სურს და შესაძლო პრესკონფერენციისთვის უჩვეულო ნივთიც აქვს გადანახული - ხელის სადეზინფექციო საშუალების ბოთლი, რომელიც 2022 წელს ლონდონის სასტუმროში დაპირისპირებისას ქართველისკენ ისროლა.
ბრიტანელმა მებრძოლმა ჯერემი პივენთან საუბარში თქვა, რომ ბოთლს ავტოგრაფი დააწერა და საკუთარ დარბაზში ინახავს.
თოფურიასთან ბრძოლის დანიშვნის შემთხვევაში კი მის პრესკონფერენციაზე წაღებას აპირებს.
„იმედი მაქვს, შემდეგი ილია იქნება. მძულს. ჩემთან დაპირისპირების გამო წინ წამოსწიეს და რეიტინგშიც სწრაფად დააწინაურეს. მანამდე არავინ იცოდა, ვინ იყო.
ზუსტად ის სადეზინფექციო საშუალების ბოთლი მაქვს, რომელიც თავში ვესროლე. ავტოგრაფი დავაწერე და ახლა დარბაზში დევს. თუ ოდესმე მასთან ბრძოლა მექნება და პრესკონფერენციაზე ერთად ვიქნებით, თან წავიღებ და უბრალოდ მაგიდაზე დავდებ. საკმაოდ სასაცილო იქნება“, - განაცხადა პიმბლეტმა.
მათი დაპირისპირება პიმბლეტისა და გურამ ქუთათელაძის ინტერნეტკამათს მოჰყვა. თოფურიამ ბრიტანელს საქართველოსა და რუსეთ-საქართველოს ომზე გაკეთებული კომენტარების გამო პასუხი მოსთხოვა და ლონდონის სასტუმროში მომხდარი კონფლიქტისას, მათი გაშველება დაცვას მოუწია.
პიმბლეტი წლის დასაწყისში მსუბუქი წონის დროებითი ქამრისთვის ბრძოლაში ჯასტინ გეიჯისთან დამარცხდა, შემდეგ კი ბენუა სენ-დენის მახრჩობელა ილეთით 52 წამში მოუგო.
