იურგენ კლინსმანს სამხრეთ კორეაში იორდანიასთან გამოვარდნა არ აპატიეს

სამხრეთ კორეის ფეხბურთის ფედერაციამ მთავარი მწვრთნელის თანამდებობიდან იურგენ კლინსმანი გაათავისუფლა.

გერმანელ სპეციალისტს აზიის თასის ნახევარფინალში იორდანიასთან 0:2 წაგება და გამოვარდნა არ აპატიეს.

„მწვრთნელმა კლინსმანმა ვერ გამოავლინა ლიდერული თვისებები, რომელსაც მისგან ნაკრებში ველოდით, მათ შორის თამაშის, ფეხბურთელების და საქმისადმი მიდგომის თვალსაზრისით." - აღნიშნა ნაკრების დელეგატმა.

კლინსმანის პოპულარობა კორეაში აზიის თასის მსვლელობისას საგრძნობლად შემცირდა. მწვრთნელს ადანაშაულებდნენ იმაში, რომ გუნდის ცუდი თამაშის მიუხედავად, ის ხშირად იღიმოდა.

სამხრეთ კორეა იურგენმა 2023 წელს ჩაიბარა. აქამდე მას აშშ-ს და გერმანიის ნაკრებებში და მიუნხენის ბაიერნში აქვს ნამუშევარი.