ხულიან ალვარესმა საოცარ ტრანსფერზე უარი თქვა

ხულიან ალვარესის მომავალთან დაკავშირებით ახალი დეტალები ხდება ცნობილი, რამაც სატრანსფერო ფანჯრის ბოლო დღეებში შესაძლოა ბევრი რამ შეცვალოს.

beIN Sports-ის კორესპონდენტის ცნობით, მადრიდის ატლეტიკოს არგენტინელმა თავდამსხმელმა ლონდონის არსენალში გადასვლაზე უარი განაცხადა. აღსანიშნავია, რომ ტრანსფერის შესადგენად საქმეში პირადად მიკელ არტეტაც ჩაერთო, თუმცა ფეხბურთელის დარწმუნება ვერც მან შეძლო.

წყაროს ცნობით, ატლეტიკო ალვარესის არსენალში გაყიდვის წინააღმდეგი არ ყოფილა, თუმცა ფეხბურთელის კატეგორიულმა უარმა კლუბი რთულ მდგომარეობაში ჩააგდო. არგენტინელს მხოლოდ ერთი მიზანი აქვს, ის კარიერის გაგრძელებას კატალონიის ბარსელონაში გეგმავს.

ეს მოვლენები მოთამაშესა და მადრიდულ კლუბს შორის დაძაბულობას კიდევ უფრო ზრდის. კონფლიქტი მას შემდეგ დაიწყო, რაც ალვარესმა არგენტინის ნაკრებთან ერთად ყოფნისას საჯაროდ განაცხადა, რომ კლუბის დატოვება და "საკუთარი ოცნების" ასრულება სურს, რაც მედიამ სწორედ ბარსელონაში თამაშის სურვილად შეაფასა. მანვე აღნიშნა, რომ ატლეტიკოს ხელმძღვანელობასთან ისაუბრა და კლუბის დატოვება ყველასთვის საუკეთესო გამოსავლად მიაჩნია.

ატლეტიკოს პოზიცია და ბარსელონას სირთულეები:

მადრიდელთა უარი: ატლეტიკო კატეგორიულ უარზეა, ფეხბურთელი ლა ლიგის პირდაპირ კონკურენტს მიჰყიდოს. სწორედ ამიტომ, მათთვის ინგლისური ვარიანტი გაცილებით მისაღები იყო. ესპანური გამოცემა AS-ის ცნობით, კლუბი ახლა ალვარესისგან ბოდიშის მოხდასა და გუნდთან ერთად ვარჯიშის გაგრძელებას ელის, ბარსელონასთან მოლაპარაკებების დაწყებას კი არანაირ პირობებში არ აპირებს.

ბარსელონას მდგომარეობა: კატალონიელთათვის არგენტინელი მთავარ სამიზნეს წარმოადგენს, თუმცა გარიგების დასასრულებლად მათ ჯერ ატლეტიკოს პრინციპული წინააღმდეგობა უნდა დაძლიონ, შემდეგ კი საკუთარი ფინანსური პრობლემები მოაგვარონ, რაც ტრანსფერს კიდევ უფრო ართულებს.

პარალელურად, ვრცელდება ინფორმაცია, რომ არსენალი სიტუაციის სათავისოდ გამოყენებას და ფეხბურთელსა და კლუბს შორის არსებული კონფლიქტით სარგებლობას კვლავ აქტიურად ცდილობს.