კლუბები შეთანხმდნენ - ტროსარი თურქეთში მიდის?

ბეშიქთაშმა არსენალთან ლეანდრო ტროსარის ტრანსფერზე შეთანხმებას მიაღწია.

გარიგების ღირებულება 20 მილიონ ევროს შეადგენს. შეთანხმება მოიცავს 18 მილიონ ევროს ფიქსირებულ თანხას და დამატებით 2 მილიონ ევროს ბონუსების სახით, თუმცა ტრანსფერი ჯერ საბოლოოდ დასრულებული არ არის.

მხარეები ამ ეტაპზე ფეხბურთელის პირადი კონტრაქტისა და ხელფასის დეტალებს ათანხმებენ, რომელიც წელიწადში დაახლოებით 9 მილიონ ევრომდე იქნება.

ტროსარს არსენალთან კონტრაქტი კიდევ ერთი წლით აკავშირებს. მან 2025 წლის აგვისტოში ახალ პირობებს მოაწერა ხელი, რამაც ხელფასის მნიშვნელოვანი ზრდა მოუტანა, თუმცა მისი კონტრაქტის ვადა 2027 წლის შემდეგ აღარ გახანგრძლივებულა.

31 წლის ფეხბურთელი ამჟამად ბელგიის ნაკრებთან ერთად მსოფლიო ჩემპიონატზე იმყოფება, სადაც მისი გუნდი მერვედფინალში აშშ-ს დაუპირისპირდება.

ტროსარმა რუდი გარსიას გუნდში ტურნირის ოთხივე მატჩი ძირითად შემადგენლობაში დაიწყო. მან 2 გოლი გაიტანა ახალი ზელანდიის წინააღმდეგ 5:1 მოგებულ შეხვედრაში და საგოლე გადაცემა შეასრულა სენეგალთან 3:2 მოგებულ მატჩში, სადაც ბელგიამ ჩამორჩენის შემდეგ მოახერხა გამარჯვება.

მოსალოდნელია, რომ ტრანსფერის პროცესი მხოლოდ მას შემდეგ გააქტიურდება, რაც ბელგია მსოფლიო ჩემპიონატს დაასრულებს.