კოპა სუდამერიკანას მატჩი გულშემატკივართა შეტაკების შემდეგ ჩაიშალა

ბუენოს აირესში კოპა სუდამერიკანას მატჩი ძალადობრივი შეტაკებების შემდეგ შეწყდა – გულშემატკივრებს ტანსაცმელი გახადეს, სცემეს, ხოლო ერთი ადამიანი სასიკვდილო მდგომარეობაშია, მას შემდეგ რაც ტრიბუნის ზედა იარუსიდან გადმოვარდა.

უნივერსიდად დე ჩილემ განაცხადა, რომ მათი 19 გულშემატკივარი საავადმყოფოშია.

კლუბის ინფორმაციით, დაკავებულია 97 ჩილელი გულშემატკივარი, თუმცა ადგილობრივი მედია იუწყება, რომ ეს რიცხვი 300-ს აჭარბებს.

ორი გულშემატკივარი დანით დაჭრეს, ხოლო ტრავმირებულ გულშემატკივარს, რომელიც ესტადიო ლიბერტადორეს დე ამერიკაზე სიმაღლიდან გადმოვარდა, ოპერაცია ჩაუტარდა.

ძალადობა პირველი ტაიმის შემდეგ შესვენებაზე დაიწყო, როდესაც სტუმართა სექტორიდან ქვედა იარუსში, სადაც მასპინძელთა გულშემატკივრები ისხდნენ, სხვადასვა ნივთი ისროლეს.

მეორე ტაიმის დასაწყისში მასპინძელი გულშემატკივრები სტუმართა სექტორში შეიჭრნენ, სტუმრებს თავს დაესხნენ და იძულებული გახადეს, გაქცეულიყვნენ.

განვითარებული სცენარის შედეგად თამაში შეჩერდა, მეორე ტაიმში ფეხბურთელებმა მოედანი მაშინ დატოვეს, როცა ანგარიში 1:1 იყო, საერთო ჯამში კი ჩილელები 2:1-ს იგებდნენ.

კონმებოლმა განაცხადა, რომ მატჩი გაუქმდა „ადგილობრივი კლუბისა და უსაფრთხოების ორგანოების მხრიდან უსაფრთხოების გარანტიების არქონის გამო“.

ორგანიზაციამ დასძინა, რომ საქმე გადაეცემა მის იურიდიულ ორგანოებს და შემთხვევასთან დაკავშირებული ინფორმაცია მის სადისციპლინო კომიტეტს გადაეგზავნება.