ამ კვირაში მიუნხენი კვარაცხელიების ოჯახისთვის განსაკუთრებული ადგილია.
მაშინ, როცა ხვიჩა კვარაცხელია პსჟ-ის რიგებში ალიანს არენაზე ჩემპიონთა ლიგის საპასუხო მატჩისთვის ემზადება, მისი 16 წლის ძმა, ტორნიკე, ბაიერნის წარმომადგენლებთან შესახვედრად მიუნხენში იმყოფება.
ხვიჩას წარსული მიუნხენში
ცოტამ თუ იცის, რომ ხვიჩა კვარაცხელიას გზა ბაიერნთან იკვეთება. 2018 წლის აპრილში, 17 წლის ასაკში, მან მიუნხენურ კლუბში ერთკვირიანი საცდელი პერიოდი გაიარა. კლუბის აკადემიის ხელმძღვანელები შთაბეჭდილების ქვეშ დარჩნენ, თუმცა ტრანსფერი ბოლომდე არ მიიყვანეს. ამის შემდეგ ხვიჩას კარიერა რუსეთის გავლით ნაპოლისკენ წარიმართა, სადაც კვარადონა სტატუსი მოიპოვა, 2025 წელს კი 80 მილიონ ევროდ პსჟ-ში გადავიდა.
თორნიკე კვარაცხელია – ახალი ტალანტი
ამჟამად ყურადღების ცენტრში ხვიჩას ძმა, თორნიკეა. 16 წლის გარემარბი, რომელიც ამჟამად დინამო თბილისის სისტემაში იზრდება, საქართველოს 17-წლამდელთა ნაკრების წევრია. გასულ შაბათს ის დინამოს პირველი გუნდის განაცხადშიც გამოჩნდა.
თორნიკე კვარაცხელიას მიმართ ინტერესს ევროპის სხვა წამყვანი კლუბებიც იჩენენ, თუმცა ბაიერნთან შეხვედრა იმედს იძლევა, რომ გერმანული რეკორდმაისტერი ამჯერად ხელიდან არ გაუშვებს შანსს, დაიმატოს კვარაცხელიების ოჯახის კიდევ ერთი წარმომადგენელი.
ემოციური დაბრუნება
სიმბოლურია, რომ ხვიჩა კვარაცხელიამ ჩემპიონთა ლიგის ტიტული სწორედ მიუნხენში აღნიშნა. ახლა კი, როდესაც პსჟ პირველ მატჩში მოპოვებული მინიმალური უპირატესობით (5-4) ჩადის მიუნხენში, ხვიჩას მთავარი მიზანი კვლავ გამარჯვებაა, ტორნიკესთვის კი ეს ვიზიტი შესაძლოა ახალი, დიდი კარიერული გზის დასაწყისი გახდეს.
ფეხბურთის სამყარო თვალს ადევნებს, შეძლებს თუ არა უმცროსი კვარაცხელია იმის გაკეთებას, რაც მისმა ძმამ 2018 წელს ვერ მოახერხა და გახდება თუ არა ის ბაიერნის მომავალი ვარსკვლავი.
