ბარსელონას პრეზიდენტმა, ჟოან ლაპორტამ, თანამდებობა დატოვა, რათა არჩევნებში მონაწილეობა ხელახლა მიიღოს. აღნიშნული პროცედურა აუცილებელია კლუბის წესდების შესაბამისად.
ლაპორტასთან ერთად გადადგომის შესახებ განცხადებები წარადგინეს ვიცე-პრეზიდენტებმა — ელენა ფორტმა და რაფაელ ესკუდერომ, ასევე დირექტორთა საბჭოს წევრებმა: ფერან ოლივერმა, ჟოზეპ მარია ალბერტმა, ხავიერ ბარბანიმ, მიკელ კამპსმა, აურელი მასმა, ხავიერ პუიგმა და ჟოან სოლერ ფერემ.
არჩევნები 15 მარტს გაიმართება, გამარჯვებულები კი თანამდებობებს ოფიციალურად 1 ივლისიდან დაიკავებენ. მანამდე კლუბის პრეზიდენტის მოვალეობას ვიცე-პრეზიდენტი რაფა იუსტე შეასრულებს.
არჩევნებში ჟოან ლაპორტას მთავარ კონკურენტად კვლავ ვიქტორ ფონტი მიიჩნევა, რომელიც კლუბის მართვის საკუთარ მოდელს აქტიურად აანონსებს. მათ გარდა, საპრეზიდენტო რბოლაში მონაწილეობის სურვილი ბიზნესმენმა ჟორდი ტერმესმა და ოპოზიციური ჯგუფის, „Som un clam“-ის წარმომადგენელმა, ხოან კამპსპრუბიმ გამოთქვეს. კანდიდატებმა ოფიციალური სტატუსის მოსაპოვებლად ახლა კლუბის წევრების ხელმოწერების საჭირო რაოდენობა უნდა შეაგროვონ, რის შემდეგაც საარჩევნო კამპანია გადამწყვეტ ფაზაში შევა.
