ბარსელონა იმედოვნებს, რომ ლა ლიგის საჩემპიონო ტიტულს რაც შეიძლება მალე გაინაღდებს, რის შემდეგაც კლუბის მთელი ყურადღება ზაფხულის სატრანსფერო ფანჯრისკენ გადავა.
ერთ-ერთი მთავარი საკითხი, რომელიც გადაჭრას საჭიროებს, რობერტ ლევანდოვსკის მომავალია.
37 წლის თავდამსხმელს მოქმედი კონტრაქტი ივნისში ეწურება. მიუხედავად იმისა, რომ მაგიდაზე ხელშეკრულების გახანგრძლივების შეთავაზება დევს, მისი დარჩენა კამპ ნოუზე გარანტირებული არ არის. ვრცელდება ინფორმაცია, რომ პოლონელი სხვა ვარიანტებსაც განიხილავს, თუმცა თავად ფეხბურთელმა MD-სთან საუბრისას აღნიშნა, რომ საბოლოო გადაწყვეტილება ჯერ არ მიუღია.
ჯერ კიდევ გვაქვს ცოტა დრო. კლუბმა იცის, რას ვფიქრობ და მეც მქონდა დრო დასაფიქრებლად. არ მინდა საუბარი შემოთავაზებებსა და ჩემს მომავალზე. ახლა დარჩენილი მატჩები და გატანილი გოლები უფრო მნიშვნელოვანია. ის, რომ პრესაში ყოველდღე რაღაც ახალი იწერება, მნიშვნელობას მოკლებულია
ლევანდოვსკი ჩემპიონთა ლიგიდან გამოთიშვაზე
გამოცდილმა ფორვარდმა ატლეტიკო მადრიდთან მტკივნეულ მარცხზეც ისაუბრა. იგი იმედგაცრუებულია, თუმცა აქცენტს ლა ლიგის დასრულებაზე აკეთებს.
„ეს ყოველთვის მტკივნეულია. ბოლომდე ვცდილობდით, ვიბრძოლეთ და გვინდოდა ნახევარფინალში ყოფნა, მაგრამ ეს ფეხბურთია. ახლა კონცენტრაცია ლა ლიგაზე უნდა მოვახდინოთ. რამდენიმე თამაში დაგვრჩა და გვსურს ტიტული მოვიგოთ.
ფეხბურთი ყოველთვის სამართლიანი არ არის. ზოგჯერ ჩანს, რომ უკეთესები ვართ, მაგრამ საბოლოოდ მაინც ვაგებთ. ზედმეტად ბევრი არ უნდა ვიფიქროთ იმაზე, რაც უკვე მოხდა, ახლა მომავალზე ზრუნვაა საჭირო“, - დასძინა რობერტმა.
