ლინეკერი: "ლივერპული უდიდესი კლუბია, მაგრამ როგორ უნდა უთხრა უარი რეალს?"

გარი ლინეკერმა პრემიერ ლიგიდან ტრენტ ალექსანდრ არნოლდის შესაძლო წასვლაზე ისაუბრა.

იწერება, რომ ფეხბურთელი სეზონის ბოლოს ლივერპულს დატოვებს და უფასოდ მადრიდის რეალს შეუერთდება.

„ამას თავისი აზრი აქვს. ტრენტი ჯუდ ბელინგემთან ძალიან ახლოს არის და გუნდსაც კარგად შეეწყობოდა, იქ მას დიდი წარმატება ელოდება. იქ მას დაცვაში თამაშის გამო არ გააკრიტიკებენ ისე, როგორც ამას ჩვენ ვაკეთებთ. ლივერპულისთვის ის დიდი დანაკლისი იქნება, მაგრამ მათ კონორ ბრედლი ჰყავთ, რომელმაც თავი კარგად წარმოაჩინა.

როგორ უნდა უთხრა უარი რეალს? ლივერპული წარმოუდგენელი საფეხბურთო კლუბია, მაგრამ ახალი გამოწვევა, საზღვარგარეთ თამაში - მეც იგივე მაქვს გაკეთებული.

როგორი დიდი, ძლიერი და მდიდარიც უნდა იყოს ინგლისის პრემიერ ლიგა, უდიდესი ფეხბურთელები მაინც მიდიან ბარსელონაში და რეალში. ერთადერთი გამონაკლისი ბოლო პერიოდში - ერლინგ ჰალანდია.

ალექსანდრ არნოლდს იქ ძალიან მოეწონება, იქ მას გააღმერთებენ და მის პასებს დააფასებენ. ის კარიერის მწვერვალზეა და მას ვერ გავამტყუნებდი." - აღნიშნა ლინეკერმა.