ლიონელ მესი ფორმაში აღარ არის?

ლიონელ მესის ინტერ მაიამიმ MLS-ის აღმოსავლეთ კონფერენციის ლიდერთან, ნეშვილთან უმძიმესი მარცხი განიცადა.

მასპინძლებმა შეხვედრა აქტიურად დაიწყეს და მე-15 წუთზე ენდი ნახარის ზუსტი თავური დარტყმით დაწინაურდნენ. სულ რაღაც ხუთ წუთში სტუმრებს ანგარიშის გათანაბრების იდეალური შანსი მიეცათ, როდესაც ლუის სუარესის წაქცევისთვის დანიშნული პენალტის შესასრულებლად ბურთთან ლიონელ მესი მივიდა.

არგენტინელი ვარსკვლავის დარტყმა საკმაოდ სუსტი აღმოჩნდა და მეკარემ ბურთი მარტივად მოიგერია. დამატებაზე სერხიო რეგილონმა კი გაიტანა, თუმცა საჯარიმოში დროზე ადრე შესვლის გამო გოლი გაუქმდა. მიუხედავად ამისა, ინტერ მაიამიმ ანგარიშის გათანაბრება მაინც მოახერხა, ტელასკო სეგოვიამ მეტოქეს შესანიშნავად დააღწია თავი და ბურთი შორეულ კუთხეში ზუსტად გაგზავნა.

შესვენების შემდეგ სიტუაცია რადიკალურად შეიცვალა და მოედანზე სრულად ნეშვილი დომინირებდა. ჰანი მუხტარის დუბლმა და სემ სარიჯის ზუსტმა დარტყმამ შეხვედრის საბოლოო ანგარიში, 4:1 უკვე 63-ე წუთზე დააფიქსირა. ამ გამარჯვებით ნეშვილმა აღმოსავლეთ კონფერენციაში პირველი ადგილი გაიმყარა და 19 ტურის შემდეგ 43 ქულა აქვს, ინტერ მაიამი კი 38 ქულით მეორე პოზიციაზე იმყოფება.