ლიონელ მესისა და ლუის სუარესს მაგია დააკლდათ

ინტერ მაიამის ახალი საშინაო არენა, Nu Stadium, პირველ გამარჯვებას კვლავ ვერ ზეიმობს.

ლიონელ მესიმ და ლუის სუარესმა ნიუ ინგლენდ რევოლუშენის წინააღმდეგ გამართულ მატჩში (1:1) გადამწყვეტი გარდატეხის შეტანა ვერ შეძლეს. სტუმართა მეკარემ, ტერნერმა, 9 სეივი შეასრულა და ლეგენდარულ დუეტს გატანის ყველა შანსი მოუსპო.

ეს იყო 39 წლის ლუის სუარესის იშვიათი გამოჩენა ძირითად შემადგენლობაში. მატჩის წინ გუნდის დროებითმა მწვრთნელმა, გილერმო ოიოსმა, ვეტერანთა წყვილი ასე შეაფასა:

ლუისი მხოლოდ ერთ-ერთი ვარიანტი არ არის. ის ფეხბურთელია, რომელსაც 600-ზე მეტი გოლი აქვს გატანილი. მას და ლეოს ჯამში 1500-ზე მეტი გოლი აქვთ გატანილი. ეს ნორმალური არ არის. ასეთ რამეს ვერსად ნახავთ. ხალხი მათ სანახავად და მათი მაგიის საყურებლად მოდის. ეს არაჩვეულებრივია

თუმცა, ბარსელონას ყოფილი ვარსკვლავების მაგია ამჯერად საკმარისი არ აღმოჩნდა. ეს ინტერ მაიამის ზედიზედ მესამე ფრეა საკუთარ ახალ სტადიონზე. კლუბის თანამფლობელი, ხორხე მასი, უკვე მომავალზე ფიქრობს და სურს, რომ „მესის ეფექტი“ არგენტინელის წასვლის შემდეგაც შენარჩუნდეს:

ჩვენი ფანები სულ გვეკითხებიან, ვინ იქნება შემდეგი. ჩვენ ყოველთვის ვცდილობთ გავაფორმოთ კონტრაქტები ვარსკვლავებთან, მაგრამ ასევე ახალგაზრდა ტალანტებთან, რათა ჩვენს მხარდამჭერებს კუთვნილების განცდა ჰქონდეთ. რაც ჩვენი გულშემატკივრებისთვის მნიშვნელოვანია, ეს არის კონკურენცია და გამარჯვება. მინდა ვისიამოვნო მესით მანამ, სანამ ის ჩვენთანაა, მომდევნო ორი წლის განმავლობაში

ინტერ მაიამი ამჟამად გარდამავალ ეტაპზეა, რადგან გუნდს დროებითი მწვრთნელი ჰყავს მას შემდეგ, რაც ხავიერ მასკერანომ პოსტი მოულოდნელად დატოვა. მიუხედავად საშინაო კედლებში მოუგებელი სერიისა, გუნდი აღმოსავლეთ კონფერენციის სათავეში რჩება.