ლისაბონური დერბი - ქოჩორაშვილი პირველი პორტუგალიური ტიტულისთვის იბრძოლებს

დღეს პორტუგალიის სუპერ თასის მატჩი გაიმართება.

ახალი პორტუგალიური სეზონის პირველ ოფიციალურ შეხვედრაში ლისაბონურ დერბის ვიხილავთ, სადაც ერთმანეთს პორტუგალიის ჩემპიონი სპორტინგი და თასის ფინალისტი ბენფიკა დაუპირისპირდებიან.

სპორტინგმა გასულ სეზონში დუბლი შეასრულა - ჩემპიონატში ორქულიანი უპირატესობით სწორედ ბენფიკას აჯობა და თასის ფინალშიც თანაქალაქელი მეტოქე 3-1 დაამარცხა.

იქიდან გამომდინარე, რომ ორივე ტიტული სპორტინგმა მოიგო, სუპერ თასზე მისი მეტოქე თასის ფინალისტი ბენფიკა იქნება.

ორივე გუნდს პორტუგალიის სუპერ თასი 9-ჯერ აქვს მოგებული და დღეს რომელიმე მათგანი მე-10 ტიტულს აღნიშნავს. ეს ტიტული ყველაზე მეტჯერ (24) პორტუს აქვს მოგებული.

ქართველი გულშემატკივრისთვის განსაკუთრებული იქნება ეს მატჩი, რადგან მისი პირველი პორტუგალიური ტიტულისთვის იბრძოლებს გიორგი ქოჩორაშვილი, რომლის ოფიციალურ დებიუტსაც სპორტინგში სწორედ ლისაბონურ დერბიში ველოდებით.

ასევე საინტერესოა, ვიქტორ გიოკერეშის გარეშე დარჩენილი სპორტინგის ნახვა, რომელმაც გასული სეზონის წარმატებაში უდიდესი როლი ითამაშა.

ლისაბონური დერბი 23:45 საათზე დაიწყება.