ტურინის იუვენტუსმა ამერიკელ ნახევარმცველ უესტონ მაკკენისთან თანამშრომლობა გააგრძელა და მასთან ახალი, გრძელვადიანი კონტრაქტი 2030 წლის 30 ივნისამდე გააფორმა.
გავრცელებული ინფორმაციით, 27 წლის ფეხბურთელი წლიურად 4 მილიონ ევროს მიიღებს.
მიუხედავად იმისა, რომ მაკკენის მომავალს ბოლო პერიოდში ბაიერ ლევერკუზენს, მარსელსა და ინტერს უკავშირებდნენ, მან კვლავ ბიანკონერიში დარჩენა არჩია, სადაც ლუჩანო სპალეტის ხელმძღვანელობით გუნდის ერთ-ერთ მთავარ მოთამაშედ ჩამოყალიბდა.
მაკკენიმ, რომელიც ტურინულ კლუბს 2020 წელს შალკედან შეუერთდა, მიმდინარე სეზონში საოცარი პროგრესი აჩვენა: 38 მატჩში მან 15 საგოლე გადაცემა მიითვალა და ამ მაჩვენებლით გუნდში მხოლოდ კენან ილდიზს (17 ასისტი) ჩამორჩება.
აღსანიშნავია, რომ მაკკენის საბაზრო ღირებულება ამჟამად 22 მილიონ ევროს შეადგენს და ის ზაფხულის სატრანსფერო ფანჯრისას ერთ-ერთი ყველაზე მოთხოვნადი თავისუფალი აგენტი იქნებოდა, თუმცა იუვენტუსმა მისი შენარჩუნება 2026 წლის მსოფლიო ჩემპიონატის დაწყებამდე მოახერხა.
