მანჩესტერის კრიტიკა, ხელის თხოვნა და მილიარდერობა, როგორც ოქროს ბურთი - რონალდუს ინტერვიუ [ნაწილი 1]

კრიშტიანუ რონალდუმ ახალი დიდი ინტერვიუ ჩაწერა - ბუნებრივია, თავის მეგობარ პირს მორგანთან. მათი წინა საუბარი ფეხბურთელს მანჩესტერ იუნაიტედიდან სკანდალური წასვლის ფასად დაუჯდა.

წამყვანმა რამდენჯერმე ხმამაღლა შეიცხადა: "ყველაზე პირადი და გულწრფელი ინტერვიუ, რომელიც კრიშტიანუს ოდესმე ჩაუწერია. ცენზურის გარეშე. ის ისტორიაში საუკეთესო ფეხბურთელია, ყველა დროის ყველაზე დიდი ვარსკვლავი და ინსტაგრამზე ყველაზე მეტი გამომწერის მქონე კაცი. ჩვენს წინაშე ის გაიხსნება ისე, როგორც არასდროს."

ისიც თქვა, რომ ინტერვიუს ანონსმა X-სა და ინსტაგრამზე 24 საათში 51 მილიონი ნახვა დააგროვა: "აი, რატომ არის ის უდიდესი." თვითონ ინტერვიუ ორ ნაწილად არის გაყოფილი და ჯერჯერობით მხოლოდ პირველი გამოვიდა. ვიდეოს ყურება თავადაც შეგიძლიათ - აქ დაჭერით, თუმცა გასამარტივებლად საუკეთესო ფრაგმანტები თქვენთვის შევკრიბეთ და ტექსტურ ფორმატში გთავაზობთ:

იუნაიტედს სტრუქტურა არ აქვს, კლუბი არასწორი გზით მიდის

საუბარი მორგანისთვის საყვარელი არსენალით დაიწყეს: წამყვანი დაინტერესდა, რატომ არ აქვს გამოტანილი გამოსაჩენ ადგილას ლონდონელების მაისური, რომელიც მან უსახსოვრა. შემდეგ კი არტეტას გუნდის სატიტულო შანსებზე ჰკითხა, რაზეც რონალდუმ დადებითი პასუხი მიუგო შემდეგ იუნაიტედის კრიტიკაზე გადაერთო.

- როგორ ფიქრობ, მოიგებს არსენალი ამ სეზონში პრემიერ ლიგას?

„შესაძლებელია. ვფიქრობ, პრემიერ ლიგის ტოპ-გუნდები ერთმანეთთან დონით ძალიან ახლოს არიან, ამიტომ წინასწარ ვერ გაიგებ, რა მოხდება. რთული ლიგაა. 

თუმცა, მანჩესტერი მას ნამდვილად ვერ მოიგებს, იმიტომ რომ ბევრი ქულა დაკარგა და დიდი ჩამორჩენა აქვს. შესაძლებელი არის კი, მაგრამ არ მჯერა. არსენალი? შესაძლებელია.

- მომეცი იმედი...

"ეს შესაძლებელია."

- შეგიძლია პირდაპირ თქვა "არსენალს შეუძლია პრემიერ ლიგის მოგება"?

არსენალს შეუძლია პრემიერ ლიგის მოგება.

- მადლობა.

ზოგადად, მანჩესტერის გამო გულდაწყვეტილი ვარ - ეს მსოფლიოს ერთ-ერთი უმნიშვნელოვანესი კლუბია, რომელიც, გასაგები მიზეზების გამო, დღემდე ჩემს გულშია. ჭკვიანი ხალხის რჩევებს უნდა გაყვე, რათა სამომავლოდ კარგი ფუნდამენტი შეიქმნა, როგორც ეს იუნაიტედმა მრავალი წლის წინ გააკეთა. ნიკი ბატი, გარი ნევილი, როი კინი, დევიდ ბექჰემი - ისინი ვარსკლავებად იმიტომ იქცნენ, რომ მშივრები და ახალგაზრდები იყვნენ.

დღეს მანჩესტერს არ აქვს სტრუქტურა. იმედი მაქვს, მომავალში ეს შეიცვლება, რადგან კლუბს უდიდესი პოტენციალი აქვს. 

რა თქმა უნდა, იუნაიტედს დღემდე ვადევნებ თვალს, იქ მრავალი-მრავალი წელი ვითამაშე, ჩემპიონთა ლიგა მოვიგე, ოქროს ბურთი, 12-13-14 ტიტული. მიყვარს ეს კლუბი. თუმცა გულწრფელი უნდა ვიყო და ვთქვა: მისმინეთ, ისინი არასწორი გზით მიდიან. ცვლილებებია საჭირო და ახლა ფეხბურთელებზე და მწვრთნელზე არ ვლაპარაკობ.

ამორიმი ყველაფერს აკეთებს, რაც შეუძლია. სხვა რა გზა აქვს? მხოლოდ სასწაულის იმედი თუ ექნება, სასწაულები კი არ არსებობს. ჩვენთან, პორტუგალიაში ამბობენ: "სასწაულები მარტო ფატიმაში ხდება. [ფატიმა — ქალაქი, სადაც მდებარეობს ფატიმის ტაძარი, პორტუგალიის მნიშვნელოვანი სამლოცველო ადგილი - ავტ] გუნდს კარგი ფეხბურთელები ჰყავს, თუმცა ზოგს უბრალოდ წარმოდგენა არ გააჩნია, რას ნიშნავს მანჩესტერ იუნაიტედი.

მილიარდერობა მინდოდა. ეს ოქროს ბურთის მოგებას ჰგავდა

ახლახანს Bloomberg-მა გამოაცხადა, რომ კრიშტიანუ რონალდუ 1.4 მილიარდიანი ქონებით პირველი ფეხბურთელი მილიარდერი გახდა. თავად კრიშტიანუ ამას ახალ რეკორდად აღიქვამს:

„არაა სიმართლე, მილიარდერი ბევრად ადრე გავხდი (იცინის) - ჯერ კიდევ 39 წლის ასაკში.

ვიცოდი, რომ ეს მოხდებოდა, ასე რომ მზად ვიყავი. უბრალოდ დროის ამბავი იყო და სიმართლე უნდა ვთქვა, ძალიან გამიხარდა. ოქროს ბურთის მოგებას ჰგავდა.

მიზნებს ყველა ისახავს - ააშენო სახლი, იყიდო მანქანა. ჩემი მიზანი კი ამის მიღწევა იყო. ფულით შეპყრობილი არ ვარ. ფული შეიძლება დაგეხმაროს, მაგრამ როცა რაღაც დონეს მიაღწევ, მერე უკვე ფულს მნიშვნელობა ეკარგება. თუმცა ადამიანები ასეთები ვართ - არასდროს გვაკმაყოფილებს ის, რაც გვაქვს.

ეს კიდევ ერთი რეკორდია - ციფრები არ იტყუება. არ გამკვირვებია - საკუთარი პოტენციალი როგორც საფეხბურთო მოედანზე ვიცი, ისე მის ფარგლებს გარეთაც.

კარიერის დასრულებისთვის 25 წლიდან ვემზადები. ალბათ, ვიტირებ კიდეც

პირს მორგანმა კრიშტიანუს კარიერის პირველი გოლის გახსენება სთხოვა და პორტუგალიელს გაუკვირდა, რომ ჟურნალისტს ის არ უნახავს: "უნდა ნახო. უფ, მაგარი იყო. მართლა არ გინახავს? გასაკვირია. ეს ის მომენტია, როცა ხალხმა თქვა: "ეს ბიჭი მაგარი ფეხბურთელი გახდება."

რა თქმა უნდა, ვიდეო ერთად ნახეს. მერე პირს მორგანმა რონალდუს გოლების რაოდენობა გაიხსენა [იმდროისთვის 948] და პორტუგალიელმა არ გაუშვა შანსი და კიდევ ერთხელ აღნიშნა, რომ მისი ყველა გოლის ვიდეოც მოიპოვება.

„კარიერის დასრულება? მალე მოხდება. თუმცა ვფიქრობ, ამისთვის მზად ვიქნები. ადვილი არ იქნება, რა თქმა უნდა. რთული იქნება, კი. ალბათ ვიტირებ კიდეც, ტირილი არ მიჭირს და ემოციებს არ ვმალავ. გულწრფელი და გახსნილი ადამიანი ვარ.

კი, ძალიან, ძალიან გამიჭირდება. თუმცა პირს, ამისთვის 25-27 წლიდან ვემზადები. ასე რომ ვფიქრობ, ამ ზეწოლას გავუძლებ."

„ფეხბურთს ვერაფერი ვერ შეედრება. თუმცა ყველაფერს აქვს დასაწყისი და დასასრული. მე სხვა ინტერესებიც მაქვს. უფრო მეტ დროს დავუთმობ ოჯახს და საკუთარ თავს. უფრო დიდ ყურადღებას დავუთმობ შვილებს და საკუთარ ჰობის: UFC-ის ყურება ძალიან მომწონს, მინდა უფრო მეტი გავიგო საკუთარ ბიზნესებზე, უფრო დიდი დრო გავატარო იუთუბ-არხზე."

ქორწილს მსოფლიო ჩემპიონატის შემდეგ ვგეგმავთ, თასთან ერთად

აგვისტოში რონალდუმ ჯორჯინას, რომელთანაც 2016-დან ურთიერთობაშია, ხელი სთხოვა და ახლა გაიხსენა, როგორ მოხდა ეს ყველაფერი:

„სახალისო იყო. ვიცოდი, რომ ერთხელ ამას გავაკეთებდი, მაგრამ არ ვიცოდი, როგორ. რთული იყო. სულ ვამბობ, რომ კარგი რაღაცები სწორ დროს და ბუნებრივად მოდის.

ჯორჯინამ მთხოვა, მისთვის ბეჭედი მეჩუქებინა, იმიტომ რომ მასზე ოცნებობდა. ვიპოვე ზუსტად ისეთი, როგორიც მას უნდოდა. თუმცა არ ვფიქრობდი, რომ ხელს ვთხოვდი. რაღაც მომენტში, როცა ბეჭდის ჩუქებას ვაპირებდი, ერთ-ერთმა მეგობარმა ვიდეოს გადაღება დაიწყო. აქამდე მას მსგავსი არაფერი გაუკეთებია. ვიცი, რომ ჩემს მეგობრებს ბოლო 10 წელიწადში მსგავსი რამ არასდროს გაუკეთებიათ. ისინი საერთო სურათების გადაღებასაც კი არ მთხოვენ და ახლა როცა კამერით ხელში დავინახე, გამიკვირდა.

ღამის პირველი საათი იყო - ბავშვებს ეძინათ. იმ მომენტში, როცა მეგობარმა ბეჭედი მომცა, რომ ჯორჯინასთვის მეჩუქებინა, გოგოები შემოვიდნენ ოთახში და მითხრეს: "მამა, დედას ბეჭედი უნდა აჩუქო და ჰკითხო, ცოლად გამოგყვება თუ არა?" ამ მომენტში ვიფიქრე, რომ კი, საამისოდ კარგი დროა.

მუხლი არ მომიდრეკია, იმიტომ რომ აღელვებული ვიყავი. ვთქვი რაღაც მარტივი სიტყვები - არც ისე რომანტიკული ბიჭი ვარ. არ ვარ იმათთაგან ერთ-ერთი, ვინც ყოველ კვირა სახლში ყვავილებით ბრუნდება. შეიძლება თვეში ერთხელ, მაქსიმუმ. თავისებურად რომანტიკული ვარ.

ერთი რაღაც, რაც მომწონს - იმ მომენტში მას ბეჭედი საერთოდ არ აინტერესებდა. მარტო ის მკითხა, სიმართლეს თუ ვლაპარაკობდი. მე ვუპასუხე, რომ მინდა, მასზე ვიქორწინო. არ მიტირია, მაგრამ მისი რეაქციის შემდეგ ცოტა ცრემლები მომადგა. მისთვის ხელი იმიტო არ მითხოვია, რომ ჩემი შვილების დედაა - ის არის ადამიანი, რომელიც ყველაზე მეტად მიყვარს, მთელი ჩემი ცხოვრების სიყვარულია და ჩვენს ურთიერთობაში არაფერი არ შეიცვლება - ეს ცხოვრების ულამაზესი თავია.

ქორწილის თარიღი ჯერ დათქმული არ გვაქვს. მსოფლიო ჩემპიონატის შემდეგ ვაპირებთ... თასთან ერთად. ჯერ ადგილიც არ ვიცით. დიდი წვეულებების მოყვარული არ არის, ასე რომ მის არჩევანს პატივს ვცემ."

- რა არის ყველაზე ძვირფასი ნივთი, რომელიც ოდესმე შეგიძენია?

ყველაზე ძვირფასი... ალბათ თვითმფრინავი.

- მომწონს, რომ დაფიქრდი. რა თვითმფრინავი?

13 წელი მყავდა საკუთარი თვითმფრინავი, თუმცა ერთი წლის წინ შეცვლა მომიწია, ასე რომ ცოტა ძვირი კი დამიჯდა.

- რა მოდელი გყავს?

Global Express.

„როგორც უკვე ვთქვი, ფული გაძლევს მატერიალური სიკეთის საშუალებას და ეს კარგია. თუმცა ახლა ცხოვრების ისეთ ეტაპზე ვარ, როცა ეს აღარ მაინტერესებს. მინდა სხვა თავი დავიწყო ცხოვრების, დიდი ხარჯების გარეშე. ჩემი ოცნებები უკვე ახდა, 20-30 წლის ასაკში ავიხდინე. ადრე მანქანები და ყველაფერი მასთან დაკავშირებული მიყვარდა, ახლა ეს ვნება აღარ მაქვს.

თვითმფრინავს ვფლობ, იმიტომ რომ უბრალო ადამიანი არ ვარ და ის თავს კომფორტულად მაგრძნობინებს. ამაზე მეტს აღარ ვეძებ. ვცდილობ, უბრალოდ ცხოვრებით ვისიამოვნო. როგორც კარლ იუნგმა თქვა, 40 წლის შემდეგ ნამდვილ ცხოვრებას იწყებ და მე ამას უკვე ვგრძნობ. ჩემთვის ფული კარგია, მაგრამ არა ყველაზე მნიშვნელოვანი. არ ვხარჯავ ფულს, მაღაზიებში არ დავდივარ. თუ სადმე წავალ, შემიძლია ყველაფერი ვიყიდო, რაც მომინდება, მაგრამ აღარ მჭირდება.

კარგი, ვთქვათ, სამი დღის წინ მანქანა ვიყიდე, კოლექციისთვის. მაგრმა არ ვაპირებ ამ მანქანის ტარებას, ეს ინტესტიციასავით არის.

- რა მანქანა?

მერსედესი. ბოდიში, მერსედესიც მყავს, მაგრამ Bugatti Tourbillon-ი შევიძინე, ეს ინვესტიციაა. 

- ახლა რამდენი მანქანა გყავს?

არ ვიცი.

- არ იცი, რამდენი მანქანა გყავს?

არ ვითვლი მანქანებს, ,მართლა. არ ვითვლი.

- მომწონს, რომ შენი პირიდან ეს ჩვეულებრივი ამბავივით ისმის

მაგრამ ეს ნორმალურია, არ მინდა თავმდაბლობა. ეს ფაქტია. მართლა არ ვიცი, რამდენი მანქანა მყავს, 40 თუ 41. არ ვიცი, ბავშვებს გეფიცებით.

- რომელია შენი საყვარელი მანქანა?

Bugatti-ზე ვგიჟდები. რამდენიმე მყავს, ყველა განსხვავებული მხეცია.

- კი მაგრამ ოდესმე გიტარებია ეს მანქანები?

სიმართლე გითხრათ, არ მიტარებია. მაგალითად, მადრიდში ერთი კვირა გავატარე და საკუთარ ფარეხშიც კი არ შევსულვარ, რომ გადამემოწმებინა, არის თუ არა იქ მანქანა. იმ დღეს, როცა მივდიოდი, ორი ბუგატი ტექდათვალიერებაზე გავუშვი და როცა დაბრუნდნენ, გადავხედე - მთავარია, მწყობრში და სუფთად იყოს. თუმცა, როგორც უკვე ვთქვი, მანქანები აღარ მიტაცებს."

***

ბოლოს მორგანმა აღნიშნა, რომ ინტერვიუს მეორე ნაწილი წინ გველის. როგორც ჩანს, იქ დიოგუ ჟოტას, დონალდ ტრამპისადმი დამოკიდებულებასა და მსოფლიო ჩემპიონატის მოგების მნიშვნელობაზე იქნება საუბარი.

თიზერში, რონალდუ ამბობს, რომ მუნდიალის მოგებაზე არ ოცნებობს: „როგორ იმოქმედებს მსოფლიო ჩემპიონატი ჩემს კარიერაზე? როგორ შეიძლება ერთმა ტურნირმა, ამ 6-7-მა თამაშმა გადაწყვიტოს, ხარ თუ არა ისტორიაში ერთ-ერთი საუკეთესო ფეხბურთელი? რანაირად არის ეს სამართლიანი?"

ველოდებით გაგრძელებას...