კრიშტიანუ რონალდუსთვის ალ ნასრიში თამაში მხოლოდ ინდივიდუალურ რეკორდებსა და გოლების გატანას აღარ უკავშირდება.
საუდის არაბეთში მისგან მთავარ მიღწევას, აზიის ჩემპიონთა ლიგის მოგებას ითხოვენ, რასაც კლუბის ქომაგები წლებია უშედეგოდ ელოდებიან.
ამ თემას ალ ჰილალის გულშემატკივარი და ცნობილი ჟურნალისტი, სამი ალ-ჰარირი გამოეხმაურა. მან სოციალურ ქსელში პორტუგალიელს პირდაპირ მიმართა და აღნიშნა, რომ თუ რონალდუმ პორტუგალიის ნაკრებთან ერთად 2016 წელს ევროპის ჩემპიონატი მოიგო, იგივეს გაკეთება აზიაში ალ ნასრისთვისაც უნდა შეძლოს.
„ალ ჰილალის, ალ იტიჰადისა და ალ აჰლის ქომაგები კონტინენტურ წარმატებას ზეიმობენ. კიდევ რამდენი ხანი უნდა ელოდოს ალ ნასრის გულშემატკივარი? რა გაფერხებს, დონ?“ - დაწერა ჟურნალისტმა და მთავარი პასუხისმგებლობა სწორედ პორტუგალიელ ვარსკვლავს დააკისრა.
აღსანიშნავია, რომ ალ ნასრის აზიის მთავარი საკლუბო ტურნირი არასდროს მოუგია. ბოლოს გუნდი კონტინენტურ ტიტულთან ახლოს 2026 წლის მაისში იყო, თუმცა ფინალში იაპონურ გამბა ოსაკასთან 1:0 დამარცხდა, მიუხედავად იმისა, რომ ძირითად შემადგენლობაში რონალდუ, სადიო მანე და ჟუაო ფელიქსი თამაშობდნენ. მორიგმა მარცხმა კი კვლავ გააჩინა კითხვები, შეძლებს თუ არა გუნდი ვარსკვლავური რესურსის ტიტულად ქცევას.