მაქსის პირველი გამარჯვება სინგაპურში - კიმი ჩემპიონობას მიუახლოვდა

მაქს ვერსტაპენმა სინგაპურის გრან პრიზე დამაჯერებელი გამარჯვება მოიპოვა.

რედ ბულის პილოტმა ცხელ და ნოტიო პირობებში გამართულ რბოლაში ლიდერობა სტარტიდან ფინიშამდე შეინარჩუნა და მარინა ბეის საქალაქო ტრასაზე კარიერაში პირველად გაიმარჯვა.

პირველ მოსახვევში შარლ ლეკლერის შეტევის მოგერიების შემდეგ ფერსტაპენმა ლიდერობა შეინარჩუნა.

მიუხედავად იმისა, რომ ფერარის პილოტი თავდაპირველად მას ახლოს მიჰყვებოდა, მსოფლიოს 4-გზის ჩემპიონმა მალევე შეძლო უპირატესობის გაზრდა და მდევართან მნიშვნელოვანი სხვაობის შექმნა.

რბოლის შუა ნაწილში განხორციელებულმა პიტსტოპებმაც ფერსტაპენის დამაჯერებელი ასპარეზობა ვერ შეცვალა. ნიდერლანდელმა პიტსტოპი უპრობლემოდ გაიარა და რბილი საბურავები საშუალო საბურავებით შეცვალა.

ამის შემდეგ ვერსტაპენისთვის ლიდერობის შენარჩუნებაში ხელი აღარავის შეუშლია. მიუხედავად რადიოკავშირის პრობლემებისა, რის გამოც გუნდს მასთან კომუნიკაციისთვის პიტლეინიდან საინფორმაციო დაფის გამოყენება მოუწია, ნიდერლანდელმა საბოლოოდ კარიერაში 73-ე გამარჯვება მოიპოვა. აღსანიშნავია, რომ ეს მისი 250-ე გრან-პრი იყო.

შარლ ლეკლერმა მე-2 პოზიცია შეინარჩუნა და ფინიშის ხაზი გამარჯვებულზე 7.3 წამით გვიან გადაკვეთა. პოდიუმის მე-3 საფეხური კი მერსედესის ახალგაზრდა პილოტმა კიმი ანტონელიმ დაიკავა.

ამ შედეგით იტალიელმა ჩემპიონატის საერთო ჩათვლაში ლიდერობა კიდევ უფრო განიმტკიცა.

მაკლარენის პილოტებმა, ლანდო ნორისმა და ოსკარ პიასტრიმ, შესაბამისად, მე-4 და მე-5 ადგილები დაიკავეს. მათ უკან კი ფერარის მეორე პილოტი, ლუის ჰამილტონი გავიდა.

რეისინგ ბულსის წარმომადგენელმა ლიამ ლოუსონმა მე-7 ადგილი დაიკავა და გუნდს მნიშვნელოვანი ქულები მოუტანა, ხოლო აუდის პილოტმა ნიკო ჰიულკენბერგმა რბოლა მე-8 პოზიციაზე დაასრულა.

კიმი ანტონელი ჩემპიონატის საერთო ჩათვლაში 102-ქულიანი უპირატესობით ლიდერობს და შესაძლოა, მსოფლიოს ჩემპიონი უკვე მომდევნო ეტაპზე, ოსტინში გახდეს.

თუ აშშ-ის გრან-პრის შემდეგ მისი უპირატესობა 125 ქულას ან მეტს მიაღწევს, ანტონელი ოფიციალურად ფორმულა 1-ის ისტორიაში ყველაზე ახალგაზრდა მსოფლიო ჩემპიონი გახდება.