,,მარადიული სიმბოლო" - იტალიური ფეხბურთის ლეგენდა გარდაიცვალა

ინტერმა პატივი მიაგო კლუბის ლეგენდას და იტალიური ფეხბურთის დიდებულ წარმომადგენელს, სანდრო მაცოლას, რომელიც 83 წლის ასაკში გარდაიცვალა.

თავდამსხმელმა ინტერში თითქმის 20-წლიანი კარიერის განმავლობაში 4-ჯერ მოიგო სერია A და 2-ჯერ-— ევროპის ჩემპიონთა თასი.

მაცოლა იტალიის ნაკრებთან ერთად 1968 წელს ევროპის ჩემპიონიც გახდა, ხოლო 2 წლის შემდეგ, 1970 წლის მსოფლიო ჩემპიონატზე, ვერცხლის მედალი მოიპოვა.

ინტერმა X-ზე განცხადება გამოაქვეყნა:

„არიან ადამიანები, რომლებიც ისტორიაში შედიან. და არიან ისეთებიც, რომლებიც თავად ხდებიან ინტერის ისტორია.

ახალგაზრდა ნერაძურიდან მარადიულ სიმბოლომდე, სანდრო მაცოლამ რამდენიმე თაობა გააერთიანა, იმარჯვებდა, გულშემატკივრებს ემოციებს ჩუქნიდა და ამ ფერებისადმი სიყვარულს მომავალ თაობებს გადასცემდა.

ის მოედანზე ბრწყინავდა და ახლაც ბრწყინავს, ჩვენი ულვაშიანი ვარსკვლავი. როგორც თავად ხშირად ამბობდა, მას მხოლოდ ერთი, უკანასკნელი სურვილი ჰქონდა: ხალხს დაემახსოვრებინა, როგორც კარგი ადამიანი, რომელიც ყოველთვის ბოლომდე იხარჯებოდა, მაშინაც კი, როდესაც ყველაფერი შეუძლებელი ჩანდა“.

მაცოლამ ინტერის მაისურით 1960-დან 1977 წლამდე 567 მატჩი ჩაატარა და 161 გოლი გაიტანა. 1968 წელს მან იტალიის ფეხბურთელთა ასოციაციის დაარსებაშიც მიიღო მონაწილეობა. იტალიის ნაკრებში მაცოლას ანგარიშზე 70 მატჩი და 22 გოლია.

საფეხბურთო კარიერის დასრულების შემდეგ ის ინტერსა და ტორინოში სპორტულ დირექტორად მუშაობდა. მოგვიანებით მაცოლა კომენტატორიც იყო და, აღსანიშნავია, რომ იტალიის ნაკრების მსოფლიო ჩემპიონატის ფინალებში გამარჯვებები როგორც 1982, ისე 2006 წელს გააშუქა.