რეალის და ვინისიუსის მოლაპარაკებები ჩიხში შევიდა.
ესპანური გამოცემა Cadena SER-ის ინფორმაციით, ბრაზილიელმა ხელფასის კილიან მბაპეს დონემდე გაზრდა მოითხოვა. საქმე ისაა, რომ ფრანგი ყოველწლიური ანაზღაურების გარდა რეალისგან უფასოდ მოსვლის ბონუსსაც იღებს, რასაც ბრაზილიელის გარემოცვა მისი ხელფასის ნაწილად მიიჩნევს და სურს, რომ ვინის ხელფასიც სწორედ მის დონემდე გაიზარდოს.
რეალი ამ ეტაპზე არ არის მზად ვინისიუსის ამ მოთხოვნის დასაკმაყოფილებლად. მეტიც, მადრიდული კლუბის ხელმძღვანელობა ბრაზილიელის ამ მოთხოვნით გაკვირვებული დარჩა, მითუმეტეს ისეთი წარუმატებელი სეზონის შემდეგ, როგორიც ვინის ჰქონდა.
სამეფო კლუბში სიმშვიდეს ინარჩუნებენ და ფიქრობენ, რომ ვინისიუსთან შეთანხმების მიღწევა შესაძლებელი გახდება. წინააღმდეგ შემთხვევაში, მომავალ ზაფხულს მისი გაყიდვის საკითხი აქტიურად წამოიჭრება.
მოქმედი ხელშეკრულება ვინის რეალთან 2027 წლამდე აკავშირებს.
