ავსტრიის ეროვნული ნაკრების მთავარმა მწვრთნელმა, რალფ რანგნიკმა, საუდის არაბეთის განადგურების (4:0) შემდეგ, ლამინ იამალი მსოფლიო ფეხბურთის მთავარ ამომავალ ვარსკვლავად დაასახელა.
მანჩესტერ იუნაიტედის ყოფილი დამრიგებელი მიიჩნევს, რომ ბარსელონას თინეიჯერს ლიონელ მესის დონის მიღწევის პოტენციალი აქვს, თუკი რეალობის განცდას არ დაკარგავს და მუშაობას გააგრძელებს.
იამალის მორიგი შოუ მუნდიალზე
ესპანეთის ნაკრების მიერ საუდის არაბეთის 4:0 განადგურების შემდეგ, რანგნიკმა იამალის ფენომენალურ ნიჭს გაუსვა ხაზი. 18 წლის შემტევმა შეხვედრის მე-10 წუთზევე გახსნა ანგარიში და მატჩის განმავლობაში აზიელთა დაცვის ხაზს ფლანგიდან უამრავი პრობლემა შეუქმნა.
Mundo Deportivo-სთან ინტერვიუში ავსტრიელთა სპეციალისტმა ესპანეთის ნაკრების ძალასა და იამალის ფაქტორზე ისაუბრა:
ესპანეთი ისეთი მეტოქეა, რომელთან შეხვედრაც არავის სურს. მათ არა მხოლოდ საფეხბურთო ისტორია შექმნეს ბოლო წლებში, არამედ ახლა ჰყავთ ლამინ იამალი - მომავლის აბსოლუტური სუპერვარსკვლავი. ვფიქრობ, თუ ის ტრავმებს აირიდებს და ვარსკვლავური სენი არ შეეყრება (მიწაზე მყარად იდგება), შეუძლია ლიონელ მესის მსგავს დონეს მიაღწიოს.
დაცული ტალანტი და ურუგვაის ბარიერი
მიუხედავად ახალგაზრდა ასაკისა, იამალი ლუის დე ლა ფუენტეს გუნდის მთავარი იარაღია. თუმცა, სამწვრთნელო შტაბი მის ჯანმრთელობას მაქსიმალურად უფრთხილდება გასულ სეზონში მიღებული ტრავმის გამო.
პირველ ტურში, კაბო-ვერდესთან მატჩში (0:0), ის მოედანზე მხოლოდ შეცვლაზე შემოვიდა, ხოლო საუდის არაბეთთან ბრწყინვალე პირველი ტაიმის შემდეგ, მწვრთნელმა მეორე ნახევარში დაასვენა, რათა ფლეი-ოფის წინ ძალები შეუნარჩუნოს. ესპანეთის ნაკრები ჯგუფის დასკვნით, უმნიშვნელოვანეს მატჩს ურუგვაის წინააღმდეგ გამართავს, სადაც იამალის როლი კვლავ გადამწყვეტი იქნება.
