ტოტენჰემის ოფიციალური გვერდის განცხადებით, რობერტო დე ძერბი გუნდის მთავარ მწვრთნელად გრძელვადიანი კონტრაქტით დაინიშნა.
რობერტომ განაცხადა: „მოხარული ვარ, რომ ვუერთდები ამ საოცარ საფეხბურთო კლუბს, რომელიც მსოფლიოში ერთ-ერთი ყველაზე დიდი და პრესტიჟულია.
კლუბის ხელმძღვანელობასთან ყველა საუბარში მათი მომავლის ამბიცია ნათელი იყო - შექმნან გუნდი, რომელიც დიდ წარმატებებს მიაღწევს და ამას მიაღწევს ისეთი ფეხბურთის თამაშით, რომელიც ჩვენს გულშემატკივრებს აღაფრთოვანებს და შთააგონებს. აქ ვარ იმიტომ, რომ ამ ამბიციას ვენდობი და გრძელვადიანი კონტრაქტი გავაფორმე, რათა ყველაფერი გავიღო მის მისაღწევად.
ჩვენი მოკლევადიანი პრიორიტეტია პრემიერ ლიგის ცხრილში წინსვლა, რაც სეზონის ბოლო მატჩის ბოლო სასტვენამდე ჩვენი სრული ფოკუსი იქნება. მოუთმენლად ველოდები სავარჯიშო მოედანზე გასვლას და ამ ფეხბურთელებთან ერთად მუშაობას, რათა ამას მივაღწიოთ."
სპორტულმა დირექტორმა, იოჰან ლანგემ განაცხადა: „რობერტო ჩვენი ნომერ პირველი სამიზნე იყო ზაფხულისთვის და ძალიან მოხარულები ვართ, რომ მისი მოყვანა უკვე შევძელით.
ის არის ერთ-ერთი ყველაზე კრეატიული და პროგრესულად მოაზროვნე მწვრთნელი მსოფლიო ფეხბურთში და მოაქვს დიდი გამოცდილება უმაღლეს დონეზე, მათ შორის პრემიერ ლიგაში."
თითქმის 300-მატჩიანი, 15-წლიანი სათამაშო კარიერის შემდეგ, ბრეშაში დაბადებულმა რობერტომ სამწვრთნელო საქმიანობა იტალიაში დაიწყო და 2018 წლის ივნისში სერია A-ს კლუბ სასუოლოს შეუერთდა, სადაც აღიარება მისი სანახაობრივი, შეტევაზე ორიენტირებული და ბურთის კონტროლზე დაფუძნებული სტილის გამო მოიპოვა.
2021 წლის მაისში მან დონეცკის შახტარი ჩაიბარა და გუნდი უეფას ჩემპიონთა ლიგის ჯგუფურ ეტაპამდე და უკრაინის სუპერთასამდე მიიყვანა - ეს იყო მისი პირველი ტიტული.
2022 წლის სექტემბერში ის ბრაიტონში გადავიდა, სადაც სადებიუტო სეზონში გუნდს ისტორიაში საუკეთესო შედეგი და ევროპულ ტურნირზე პირველად გასვლა მოუტანა.
მის ბოლო სამუშაო ადგილზე, მარსელში, ლიგა 1-ის გუნდმა 2024/25 სეზონში მეორე ადგილი დაიკავა და უეფას ჩემპიონთა ლიგის საგზური მოიპოვა.
