„მოდი და რამე გააკეთე“: ჰოკიტის პასუხი კორმიეს კრიტიკაზე

UFC-ის მებრძოლ ჯოშ ჰოკიტსა და ყოფილ ჩემპიონ დანიელ კორმიეს შორის კონფლიქტი მას შემდეგ გამწვავდა, რაც ჰოკიტმა UFC Freedom 250-ის ღონისძიებაზე ყოფილი პირველი ლედის, მიშელ ობამას მისამართით შეურაცხმყოფელი კომენტარი გააკეთა.

აღნიშნულ ფაქტს მყისიერი და კრიტიკული გამოხმაურება მოჰყვა დანიელ კორმიესგან, რომელიც ღონისძიებაზე კომენტატორის რანგში მუშაობდა. კორმიემ ჰოკიტის საქციელს უგემოვნო, ზედმეტი და ამაზრზენი უწოდა და აღნიშნა, რომ მიშელ ობამა არის ადამიანი, რომელიც ყოველთვის ღირსეულად წარმოადგენდა თავის ოჯახსა და ქვეყანას. კორმიეს თქმით, ჰოკიტის ასეთმა განცხადებებმა მხოლოდ საზოგადოების დაყოფა გამოიწვია.

ჰოკიტმა, რომელიც ცნობილია თავისი სკანდალური ხასიათით, კორმიეს პასუხი სოციალურ ქსელში გასცა. მან კორმიეს მიმართ შეურაცხმყოფელი ტერმინები გამოიყენა, უარი თქვა ერთიანობის იდეაზე და განაცხადა, რომ ოქტაგონზე მხოლოდ „ადამიანების სახეების გასაყოფად“ მიდის.

ჰოკიტმა კორმიეს პირდაპირ შესთავაზა, რომ თუ მისი ქცევა არ მოსწონს, „მოვიდეს და რამე გააკეთოს“.

მიუხედავად იმისა, რომ UFC-ის აღმასრულებელმა დირექტორმა, დანა უაითმა ჰოკიტის კომენტარი დაგმო, მან პარალელურად გამოთქვა მხარდაჭერა სიტყვის თავისუფლების პრინციპისადმი, რითაც ორგანიზაციის ორაზროვანი პოზიცია დააფიქსირა.