ლონდონის ტოტენჰემმა მადრიდის რეალთან ოფიციალური კონტაქტი დაამყარა, რათა 18 წლის არგენტინელი ვარსკვლავი, ფრანკო მასტანტუონო ინათხოვროს.
პლეიმეკერი ზაფხულში მადრიდელთა ახალი მწვრთნელის, ჟოზე მოურინიოს გეგმებში არ შედის.
9 კლუბი ერთი მოთამაშისთვის
Sport-ის ინფორმაციით, ტოტენჰემს სამხრეთამერიკელი ტალანტისთვის ბრძოლაში უდიდესი კონკურენცია ელის. მასტანტუონოს იჯარით აყვანა ევროპის 9 კლუბს სურს, მათ შორის არიან ინტერი, იუვენტუსი, პორტუ, ბენფიკა, სპორტინგი, ვილიარეალი და რენი. გამორიცხული არ არის მისი დროებით დაბრუნება რივერ პლეიტშიც.
მოურინიო რეალში შემადგენლობის გადარეხვას გეგმავს და ვარსკვლავებით გატენილ ნახევარდაცვაში მოზარდს სათამაშო დროს ვერ ჰპირდება. თუმცა, კითხვის ნიშნები ლონდონშიც ჩნდება - რობერტო დე ძერბის განკარგულებაში ამ პოზიციაზე უკვე არიან ჩავი სიმონსი, ჯეიმს მედისონი და დეიან კულუშევსკი, რაც არგენტინელის გარემოცვისთვის სასურველ სტაბილურ პრაქტიკას ართულებს.
ფუფუნება თუ საჭიროება ტოტენჰემისთვის?
სანამ კლუბი მასტანტუონოს აკვირდება, ექსპერტები მიიჩნევენ, რომ დე ძერბის პრიორიტეტები სხვაგანაა. ტოტენჰემმა დაცვა იან პაულ ვან ჰეკეთი და ენდრიუ რობერტსონით უკვე გააძლიერა, ახლა კი გუნდს ჰარი კეინის სრულფასოვანი შემცვლელი, ნამდვილი ცხრიანი სჭირდება. დომინიკ სოლანკესა და რიშარლისონის ფონზე, კლუბის ყოფილი ფეხბურთელი დარენ ანდერტონი ბორდს ბრენტფორდის თავდამსხმელის, იგორ ტიაგოს შეძენას ურჩევს.
