ირანის ეროვნული ნაკრები 2026 წლის მსოფლიო ჩემპიონატს სრულიად უპრეცედენტო და მძიმე პირობებში ხვდება. გუნდი ტურნირზე მიემგზავრება იმ დროს, როდესაც მათი ქვეყანა მუნდიალის მთავარ მასპინძელთან, ამერიკის შეერთებულ შტატებთან საომარ მდგომარეობაში იმყოფება.
Associated Press-თან ექსკლუზიურ ინტერვიუში ირანელმა ფეხბურთელებმა, რომლებიც თურქეთში, ანტალიის სანაპიროზე აქვთ საწვრთნელი შეკრება, ღიად ისაუბრეს იმ უდიდეს გეოპოლიტიკურ წნეხზე, რაც მათ მზადებაზე ახდენს გავლენას.
29 წლის გამოცდილმა ნახევარმცველმა, საიდ ეზათოლაჰიმ, რომელიც კარიერაში უკვე მესამე მუნდიალზე აპირებს თამაშს, აღნიშნა, რომ შექმნილ ვითარებაში კონცენტრაციის შენარჩუნება ძალიან რთულია. მისი თქმით, მიუხედავად იმისა, რომ ძველი გამოცდილება ემოციების მართვაში ეხმარება, სამშობლოში მიმდინარე პოლიტიკური მოვლენები და ომის ახალი ამბები მოთამაშეების ფსიქოლოგიურ მდგომარეობაზე მაინც დიდ გავლენას ახდენს.
გუნდს ტურნირის წინ სერიოზული პრობლემებიც შეექმნა - რამდენიმე ფეხბურთელს ვიზების მისაღებად ანკარაში, აშშ-ის საელჩოში მოუწია გამგზავრება. სავიზო ქაოსის გამო ირანის ნაკრებმა საწვრთნელი ბაზაც კი შეცვალა და არიზონას ნაცვლად მექსიკის სასაზღვრო ქალაქ ტიხუანაში გადაინაცვლა, საიდანაც ამ უქმეებზე მექსიკის საელჩოს დახმარებით გამგზავრებას გეგმავს.
სპეციფიკურ გარემოებებზე ისაუბრა 24 წლის დებიუტანტმა მოჰამად ღორბანიმაც, რომლისთვისაც ეს პირველი მსოფლიო ჩემპიონატია. მან ხაზი გაუსვა, რომ მიუხედავად ომით გამოწვეული სირთულეებისა, ისინი პროფესიონალი ფეხბურთელები არიან და მოედანზე მაქსიმუმი უნდა გააკეთონ, რათა მძიმე ვითარებაში მყოფ ირანელ ხალხს მცირედი სიხარული მაინც აჩუქონ.
საინტერესოა, რომ ირანის ნაკრებს პირველი ორი მატჩის ჩატარება ლოს-ანჯელესის სიახლოვეს მოუწევს, სადაც ძალიან დიდი ირანული დიასპორა ცხოვრობს. ეზათოლაჰი ამბობს, რომ სტადიონზე უამრავ ქომაგს ელოდებიან, რაც გუნდზე პასუხისმგებლობასა და მოლოდინებს კიდევ უფრო ზრდის. ირანის ნაკრებს აშშ-ის ტერიტორიაზე შესვლა 14 ივნისამდე არ მოუწევს. ისინი 15 ივნისს ახალ ზელანდიას დაუპირისპირდებიან, 21 ივნისს ბელგიას შეხვდებიან, ხოლო ჯგუფურ ეტაპს 26 ივნისს, სიეტლში, ეგვიპტესთან მატჩით დაასრულებენ.
