ფიფამ მსოფლიო ჩემპიონატის დაწყებამდე სულ რაღაც ერთი კვირით ადრე მიიღო გადაწყვეტილება, რომლის თანახმადაც გულშემატკივრებსა და მოხალისეებს სტადიონებზე მრავალჯერადი გამოყენების წყლის ბოთლების შეტანა აეკრძალათ.
ეს ნაბიჯი განსაკუთრებით რეზონანსულია იმის გათვალისწინებით, რომ 48-გუნდიანი ტურნირი აშშ-ში, კანადასა და მექსიკაში ზაფხულის პერიოდში, საკმაოდ მაღალი ტემპერატურის პირობებში ტარდება.
ორგანიზაციის განცხადებით, აკრძალვის მიზანი მოთამაშეებისა და დამსწრე საზოგადოებისთვის რისკებისა და ტრავმების თავიდან აცილებაა, რის გამოც ბოთლებთან ერთად ქილებისა და ჭიქების შეტანაც შეიზღუდა. მანამდე მოქმედი სტადიონების ქცევის კოდექსით, ცარიელი, გამჭვირვალე და მრავალჯერადი პლასტმასის ბოთლების შეტანა ნებადართული იყო.
ფიფა აღნიშნავს, რომ მაყურებლებისთვის სტადიონების გარშემო მოეწყობა სპეციალური გამაგრილებელი ზონები, ვენტილატორები და ჰიდრატაციის სადგურები, თუმცა უშუალოდ არენის ტერიტორიაზე წყლის შეძენა გულშემატკივრებს შიდა პუნქტებში მოუწევთ. ფასები იმ სტანდარტების შესაბამისი იქნება, რაც მოცემულ სტადიონებზე სხვა ღონისძიებების დროს მოქმედებს.
გარდა ამისა, ტურნირის ისტორიაში პირველად, მატჩების მიმდინარეობისას (მიუხედავად იმისა, თუ როგორი ტემპერატურა იქნება სტადიონზე) მოთამაშეებისთვის ყოველ ტაიმში 3-წუთიანი შესვენება გამოცხადდება წყლის დასალევად.
ამ გადაწყვეტილებას გულშემატკივრების მხრიდან მკაცრი კრიტიკა მოჰყვა. ინგლისის ნაკრების ფან-კლუბმა Free Lions-მა ამ ნაბიჯს უცნაური და დაგვიანებული უწოდა, რადგან მანამდე ფიფა მათ პირადად არწმუნებდა, რომ სტადიონებზე უფასო წყალი ხელმისაწვდომი იქნებოდა და საკუთარი ბოთლების შეტანასაც შეძლებდნენ.
ქომაგთა უმრავლესობა მიიჩნევს, რომ ეს გადაწყვეტილება უსაფრთხოებას კი არა, კომერციულ ინტერესებსა და სტადიონებზე წყლის ძვირად გაყიდვას ემსახურება.
