ო’მალიმ ზაჰაბის ნოკაუტით მოუგო და იანი გამოიწვია

შონ ო’მალიმ აიემან ზაჰაბი ნოკაუტით დაამარცხა და სატიტულო გზისკენ კიდევ ერთი ნაბიჯი გადადგა.

კანადელი აიემან ზაჰაბი ვაშინგტონში, თეთრ სახლში გამართულ UFC Freedom 250-ზე ჩავიდა, რათა სუპერმსუბუქი წონის ყოფილი ჩემპიონი შონ ო’მალი დაემარცხებინა და ზედიზედ მე-8 გამარჯვება მოეპოვებინა.

იმ ფონზე, როდესაც სუპერმსუბუქი დივიზიონის ჩემპიონ პიოტრ იანსა და მერაბ დვალიშვილს შორის ტრილოგიის გამართვა ყველაზე მოსალოდნელ სცენარად მიიჩნევა, ო’მალი და ზაჰაბი, შესაძლოა, მომდევნო ტიტულის პრეტენდენტის სტატუსისთვის იბრძოდნენ.

ქაღალდზე UFC Freedom 250-ის სუპერმსუბუქი წონის ერთადერთი ბრძოლა საღამოს საუკეთესო დაპირისპირების ერთ-ერთ მთავარ კანდიდატად ითვლებოდა. ო’მალიმ შეხვედრა ცენტრის კონტროლით დაიწყო და ზაჰაბის ოქტაგონის გარშემო მოძრაობას აიძულებდა.

კანადელი ხშირად იცვლიდა დგომას, რათა მეტოქე დაებნია, თუმცა ო’მალიც თავისუფლად გადადიოდა ერთი დგომიდან მეორეში და პირველ რაუნდში საკმაოდ მშვიდად გამოიყურებოდა.

მეორე რაუნდის დასაწყისში ზაჰაბიმ ფეხებზე შეტევები გააგრძელა, ხოლო ო’მალიმ ჯებების სერია გააორმაგა. კანადელი ლოუქიკებზე ფაქტობრივად სირბილით შედიოდა და დიდი წარმატებით იყენებდა ამ იარაღს.

შედეგად, ო’მალი იძულებული გახდა დგომა შეეცვალა, რადგან მარცხენა ფეხზე მიღებული დაზიანება სულ უფრო იზრდებოდა. ამავდროულად, ზაჰაბის ცხვირისა და მარცხენა თვალის არეში დაზიანების ნიშნებიც გამოჩნდა.

მიუხედავად იმისა, რომ ო’მალი მეორე რაუნდში გაცილებით უკეთ გამოიყურებოდა, ზაჰაბის ლოუქიკები კვლავ პრობლემას წარმოადგენდა.

თუმცა შემდეგ შონმა მარჯვენა ხელით დაცვა გაუხსნა მეტოქეს და სულ რამდენიმე წამში ძლიერი მარცხენათი შეარყია.

ზაჰაბი მძიმედ შეირყა, რის შემდეგაც ო’მალიმ მარჯვენა დარტყმით ბრძოლა დაასრულა. 

ბრძოლის შემდეგ ო’მალიმ მიკროფონში განაცხადა:

პეტრ იან! დღეს აქ ის უნდა ყოფილიყო. არ ვიცი, რატომ არ გამოჩნდა. ვიცი, რომ სავარაუდოდ იანისა და დვალიშვილის მესამე ბრძოლა გაიმართება, მაგრამ მეც მინდა ჩემპიონთან შეხვედრა.