ექსელსიორის ოფიციალური გვერდის ცნობით, კლუბმა შემადგენლობა ირაკლი იეგოიანით გააძლიერა.
21 წლის ქართველი ნახევარმცველი როტერდამულ გუნდს ვიტესიდან შეუერთდა და ახალ კლუბთან 3-წლიანი კონტრაქტი გააფორმა.
იეგოიანმა გასული სეზონი ვიტესში გაატარა. არნემულ გუნდში მის ანგარიშზე 37 მატჩში 9 გოლი და 5 საგოლე გადაცემა იყო. ვიტესს სულ ცოტა ხნის წინ საარსებო პრობლემები შეექმნა და კლუბს პროფეისონალური სტატუსი ჩამოერთვა, შედეგად გუნდი ბევრმა მოთამაშემ დატოვა.
იეგოიანს საქართველოს 21-წლამდელთა ნაკრებში 13 მატჩი აქვს ჩატარებული, ახლა კი ის ნიდერლანდების ერედივიზიაში ითამაშებს.
ბოლო ქართველი, რომელმაც ნიდერლანდების ჩემპიონატში ითამაშა გიორგი მიქაუტაძე იყო.
სხვადასხვა დროს ერედივიზიაში გიორგი დემეტრაძე, შოთა არველაძე, გიორგი აბურჯანია, გურამ კაშია, ვაკო ყაზაიშვილი, გიორგი ჭანტურია, გოგა გახოკიძე, აჩი არველაძე და გიორგი ქინქლაძე თამაშობდნენ.
ექსელსიორმა ახალ სეზონში ორი თამაში ჩაატარა და ორივე წააგო.
