უეფას მსაჯთა კომიტეტის ხელმძღვანელმა, რობერტო როსეტიმ ახალი სეზონისთვის მსაჯობის განახლებული წესები წარადგინა. მან გასულ სეზონში ბარსელონასა და ატლეტიკოს მატჩში დაშვებული სკანდალური შეცდომაც ახსნა და ახალი რეგულაციები განმარტა.
ბარსელონას წართმეული პენალტი
როსეტის განცხადებით, საჯარიმოში ბურთზე ხელის ნებისმიერი შეხება, თუნდაც მიზანმიმართული არ იყოს, პენალტით დაისჯება. ეს წესი ბარსელონასა და ატლეტიკოს მატჩის ინციდენტის შემდეგ დაკონკრეტდა, როდესაც ატლეტიკოს მცველმა, მარკ პუბილმა ბურთზე ხელით ითამაშა. უეფამ დაადასტურა, რომ ამ ეპიზოდში კატალონიელთა სასარგებლოდ პენალტი უნდა დანიშნულიყო.
ვინისიუსის კანონი არ იმოქმედებს
მსოფლიო ჩემპიონატზე მოქმედი ე.წ. ვინისიუსის კანონი, რომელიც მეტოქესთან საუბრისას პირზე ხელის აფარებისთვის წითელ ბარათს ითვალისწინებდა, უეფას ტურნირებზე არ იმოქმედებს. როსეტის თქმით, ეს ქმედება მაქსიმუმ ყვითელი ბარათით დაისჯება, თუ ის არასპორტულ საქციელად შეფასდება.
VAR-ის შეზღუდვა და დროის გაყვანა
ახალი რეგულაციებით, მსაჯებმა გადაწყვეტილებები უშუალოდ მოედანზე უნდა მიიღონ და VAR-ის იმედად არ უნდა იყვნენ. ვიდეორეფერი მხოლოდ აშკარა და უხეში შეცდომების დროს ჩაერევა.
შეცვლები: მოთამაშე, რომელიც მოედნის დასატოვებლად 10 წამზე მეტს დახარჯავს, დაისჯება.
კაპიტნის წესი: მსაჯთან საუბრის უფლება მხოლოდ გუნდის კაპიტანს ექნება. ნებისმიერი სხვა მოთამაშე, რომელიც არბიტრს მიუახლოვდება და გააპროტესტებს, ავტომატურად ყვითელ ბარათს მიიღებს.
