მადრიდის ატლეტიკოს ფეხბურთელმა მარკოს ლიორენტემ Instagram-ზე სთორი გამოაქვეყნა, რომელშიც ტოლედოში მომხდარი ტრაგიკული სარკინიგზო ავარიის შემდეგ ესპანეთის ტრანსპორტის მინისტრი ოსკარ პუენტე მკაცრად გააკრიტიკა. მის კრიტიკას სხვა ფეხბურთელებიც შეუერთდნენ.
ლიორენტემ პუენტეს პასუხისმგებლობის აღებისკენ მოუწოდა და სოციალურ ქსელებში მის აქტიურობასაც გამოეხმაურა:
ძვირფასო ოსკარ პუენტე, დრო ხომ არ არის, Twitter-ს თავი დაანებო და იმ საქმეზე კონცენტრირდე, რომლის შესრულებისთვისაც ჩვენ ხელფასს გიხდით? როდესაც საქმე ადამიანების სიცოცხლეს ეხება, ტრანსპორტის მინისტრისგან ყველაზე ცოტა, რისი მოთხოვნაც შეიძლება, პასუხისმგებლობა, სერიოზულობა, უსაფრთხოება და პატივისცემაა.
ლიორენტემ კრიტიკა კიდევ უფრო გაამწვავა:
ყელში ამოგვივიდნენ პოლიტიკოსები, რომლებსაც, როგორც ჩანს, უფრო მეტად სოციალურ ქსელებში კამათის მოგება აინტერესებთ და 13 წლის ბავშვებივით იქცევიან, ვიდრე საკუთარი მოვალეობების შესრულება. Twitter არ არის შენი სამსახური. შენი საქმე საზოგადოებრივი ტრანსპორტი, უსაფრთხოება და პრობლემების წარმოქმნის შემთხვევაში პასუხისმგებლობის აღებაა. ჯერჯერობით ამ ყველაფერში სრული კატასტროფა ხარ, მაგრამ, როგორც ყოველთვის, ბრალს სხვას გადააბრალებ. დაე, ცირკი გაგრძელდეს.
ლიორენტეს განცხადებას ესპანურ საფეხბურთო სამყაროში დიდი გამოხმაურება მოჰყვა. მისი პოსტი სხვა პროფესიონალმა ფეხბურთელებმაც გააზიარეს, მათ შორის თანაგუნდელმა ალექს ბაენამ, ხეტაფეს მცველმა დანი კარვახალმა და მადრიდის რეალის მეკარემ ტიბო კურტუამ.
ოთხშაბათს, ტოლედოს მახლობლად, ურდასთან მომხდარ სარკინიგზო კატასტროფას სულ მცირე 30 ადამიანის სიცოცხლე ემსხვერპლა. ოფიციალური ინფორმაციით, დაშავდა დაახლოებით 80 ადამიანი, რომელთაგან 50-ის მდგომარეობა მძიმეა.
ესპანეთის ფეხბურთის ფედერაციამ (RFEF) ესპანეთის თასის მატჩები გადადო.
