არსენალმა მორიგი სამი ქულა უკვე საფირმო სტილში მოიპოვა – 1:0 ბრაიტონთან. მეტოქის მთავარმა მწვრთნელმა, ფაბიან ჰიურცელერმა, მატჩის შემდეგ ლონდონელების თამაში გააკრიტიკა.
VIDEO: საკას გამარჯვების გოლი - არსენალმა სიტისთან სხვაობა გაზარდა
ფეხბურთის თამაშს მხოლოდ ერთი გუნდი ცდილობდა
„დღეს ფეხბურთის თამაშს მხოლოდ ერთი გუნდი ცდილობდა, გამარჯვების სხვადასხვა გზა არსებობს. თუ ისინი ჩემპიონატს მოიგებენ, არავინ იკითხავს, კონკრეტულად როგორ გააკეთეს ეს. თუმცა შესამჩნევი იყო, რომ ისინი მზად იყვნენ ყველაფერი გაეკეთებინათ ამ მატჩის მოსაგებად.
მე არასოდეს ვიქნები მწვრთნელი, რომელიც ამგვარად მოგებას შეეცდება. თუ ამ ოთახში მყოფთ ვკითხავთ, მოეწონათ თუ არა თამაში, შესაძლოა ვინმემ ასწიოს ხელი, რადგან ის არსენალის დიდი გულშემატკივარია. ლიგისა და მსაჯების მიერ დაწესებული ზღვარი უნდა არსებობდეს. ახლა მაქვს შეგრძნება, რომ არსენალი საკუთარ წესებს აწესებს.
პრემიერ ლიგამ მეტი ყვითელი ბარათი უნდა დაარიგოს დროის გაყვანის გამო. გინახავთ ოდესმე მეკარე, რომელიც ერთ მატჩში სამჯერ კოტრიალდება გაზონზე?“ — განაცხადა მატჩის შემდეგ ჰიურცელერმა.
თუმცა, მიკელ არტეტას კრიტიკა არც ადარდებს და არც უკვირს:
– რას ფიქრობთ ჰიურცელერის სიტყვებზე?
– რა მოულოდნელი განცხადებაა.
– გაღელვებთ, რას ამბობენ სხვა მწვრთნელები?
– გააჩნია, ვინ ამბობს.
