მიკელ არტეტამ განაცხადა, რომ ფაბიან ჰიურცელერის კრიტიკა არსენალის მისამართით არ გაკვირვებია, რადგან ბრაიტონის მწვრთნელს მსგავსი განცხადებების ისტორია ადრეც ჰქონდა.
ჰიურცელერი უკმაყოფილო დარჩა არსენალის მიდგომით და აღნიშნა, რომ არტეტას გუნდი საკუთარ წესებს ქმნის, თავად კი არასოდეს იქნება ისეთი მწვრთნელი, რომელიც ამ გზით შეეცდება მოგებას.
როდესაც არტეტას ჰიურცელერის კომენტარების შესახებ ჰკითხეს, მან ირონიულად უპასუხა და აღნიშნა, რომ მსგავსი რეაქციები მისთვის სიახლე არ არის. არსენალის თავკაცის თქმით, თუ წინა თამაშებს გადავხედავთ, ყოველთვის მოიძებნება მსგავსი კომენტარები სხვადასხვა მხრიდან.
რა სიურპრიზია. თუ წინა მატჩებს გადახედავთ, ყოველთვის ნახავთ მსგავს კომენტარებს. მე მიყვარს ჩემი ფეხბურთელები და ეს არის მთავარი. მომწონს ის, თუ როგორ ვიბრძვით და როგორ ვთამაშობთ. ვფიქრობ, რეალურად სხვებსაც ძალიან უყვართ ჩვენი მოთამაშეები. ყოველ ჯერზე, როცა მათზე საუბრობენ, ჩანს, რომ ისინი ქვეყანაში ყველაზე პოპულარულები არიან
არსენალის მწვრთნელმა ასევე ხაზი გაუსვა იმ ფაქტს, რომ მისმა გუნდმა დაღლილობის მიუხედავად უმნიშვნელოვანესი გამარჯვება მოიპოვა. მას შემდეგ, რაც მანჩესტერ სიტიმ ნოტინგემ ფორესტთან ქულები დაკარგა, ლონდონელების უპირატესობა ცხრილის სათავეში 7 ქულამდე გაიზარდა.
VIDEO: ფრე ნოტინგემთან - სიტიმ მნიშვნელოვანი ქულები დაკარგა
არტეტამ გამარჯვებას უდიდესი უწოდა და აღნიშნა, რომ გუნდმა ძალიან რთული გზა გაიარა. მისი თქმით, ბევრი მძიმე და მაღალი ინტენსივობის მატჩის შემდეგ, როცა ფეხბურთელებს სრულფასოვანი ვარჯიშის საშუალებაც კი არ ჰქონდათ, ბრაიტონში ჩასვლა და ასეთი შედეგის დადება მართლაც შთამბეჭდავი მიღწევაა.
