UFC ის მსუბუქი წონის რეიტინგის მეხუთე ნომერმა, პედი პიმბლეტმა პოტენციურ მეტოქეებზე, ილია თოფურიასა და არმან ცარუკიანზე საკმაოდ გულწრფელად და პროვოკაციულად ისაუბრა.
ბრიტანელის თქმით, მას ყველაზე მეტად ოქტაგონზე თოფურიასთან შეხვედრა სურს. მიუხედავად იმისა, რომ მათი დაპირისპირება პირადულია, პიმბლეტი ქართველ მებრძოლს პატივს სცემს, რადგან მიიჩნევს, რომ ილიამ წარმატების მისაღწევად დიდი შრომა გასწია.
თუ სატიტულოზე არ ვსაუბრობთ, ილია თოფურიასთან ბრძოლას ავირჩევდი, რადგან ყველაზე მეტად მისი ცემა მინდა. დიახ, ილიასთან დაპირისპირება პირადულია, მაგრამ არმანთან ბრძოლა ასევე პირადულია. სინამდვილეში ილიას პატივს ვცემ...
სრულიად განსხვავებული დამოკიდებულება აქვს ლივერპულელს არმან ცარუკიანის მიმართ. პედის განცხადებით, ცარუკიანი ფულიანი მშობლების განებივრებული შვილია, რომელსაც ცხოვრებაში ყველაფერი მარტივად მიართვეს. მან ისიც აღნიშნა, რომ არმანი საუზმეზე 2000 დოლარიან ხიზილალას მიირთმევს და მასთან ბრძოლა მხოლოდ იმიტომ უნდა, რომ ოქტაგონზე გათიშოს.
რაც შეეხება უშუალოდ თოფურიასთან სპორტულ დაპირისპირებას, პიმბლეტი საკუთარ გამარჯვებაში სრულად დარწმუნებულია. მისი იდეალური სცენარი ილიასთან ერთად The Ultimate Fighter ის ახალ სეზონში მწვრთნელის ამპლუაში მონაწილეობაა. პედი ფიქრობს, რომ 6 კვირიანი გადაღებების პროცესში თოფურიას ფსიქოლოგიურად ისე გატეხს, რომ ბრძოლის დღეს მას კონორ მაკგრეგორისა და ჟოზე ალდოს ცნობილ დაპირისპირებაზე უფრო სწრაფად დაამარცხებს.
საუბრის ბოლოს პიმბლეტმა ჯასტინ გეიჯი დაიცვა და ილია მისი დამსახურებების დაკნინებაში დაადანაშაულა. ცნობისთვის, მსუბუქი წონის ამჟამინდელი ჩემპიონი გეიჯი 2027 წლამდე ბრძოლას არ აპირებს და მსგავსი გეგმები აქვს თოფურიას გუნდსაც, შესაბამისად, დივიზიონის მთავარი მოვლენები მომავალში სავარაუდოდ სწორედ ამ ოთხეულის გარშემო განვითარდება.
