ლაშა ბექაური პარიზის ოლიმპიური თამაშების ჩემპიონია.
ფინალურ დაპირისპირებაში ქართველმა იაპონელ სანშირო მურაოს უმძიმეს ბრძოლაში მოუგო.
პირველ წუთებზე ბექაურმა ვაზარი გაუშვა და იაპონელი დაწინაურდა, თუმცა თამაშში დაბრუნება მოახერხა და ძირითად დროშივე მეტოქეს ორი ვაზარით უპასუხა.
საქართველომ 2024 წლის ოლიმპიადაზე პირველი ოქრო მოიპოვა, ბექაურისთვის კი ეს ზედიზედ მე-2 ოლიმპიური მედალია 2020-ს ტოკიოს თამაშების შემდეგ.
ბექაურმა ასპარეზობა 1/8 ფინალური ეტაპიდან დაიწყო. მისი მეტოქე პირველ შეხვედრაში ბულგარელი ივაილო ივანოვი იყო. ქართველი მალევე ვაზარით დაწინაურდა და შემდეგ ბრძოლა ბოლომდე თავის სასარგებლოდ მიიყვანა.
ქართველი 1/4 ფინალში სამხრეთ კორეელ ჯუიოპ ჰანს დაუპირისპირდა. ლაშამ შეხვედრა დამაჯერებლად წაიყვანა და მეტოქეს იპონიც შეუსრულა.
ჩემპიონი 1/2 ფინალში ქართველ ტრისტან (ტატო) მოსახლიშვილს დაუპირისპირდა, რომელიც ესპანეთის სახელით გამოდის.
ქართველებს შორის დიდი ბრძოლა გაიმართა, ძირითად დროში გამარჯვებული ვერ გამოვლინდა, გოლდენ სქორში კი ძოუდოისტები 2-2 შიდოთი გადავიდნენ, საბოლოოდ ლაშა ბექაურის აქტიურობამ შედეგი გამოიღო და მოსახლიშვილმა მესამე გაფრთხილება მიიღო, ბექაური კი ფინალში გავიდა.
