პორტუგალიის ეროვნულ ნაკრებს კრიშტიანუ რონალდუს წასვლის შემდეგ სერიოზული ფინანსური და საჯარო კრიზისი ემუქრება.
მარკეტინგის ექსპერტების შეფასებით, 41 წლის ვარსკვლავის მიერ სანაკრებო კარიერის დასრულება პორტუგალიის ფეხბურთის ფედერაციისთვის ნამდვილი ტრაგედია იქნება, რადგან გუნდის ბრენდი და შემოსავლები წლებია სწორედ ხუთგზის ოქროს ბურთის მფლობელზეა დაფუძნებული.
მარკეტინგის მენეჯმენტის ინსტიტუტის დირექტორის, დანიელ სას განცხადებით, რონალდუ ბრენდის თვალსაზრისით შეუდარებლად დიდია, ვიდრე თავად პორტუგალია. 2026 წლის მსოფლიო ჩემპიონატზე ესპანეთთან მერვედფინალში გამოთიშვის შემდეგ, რონალდუმ დაადასტურა, რომ ეს მისი ბოლო მუნდიალი იყო, რის შემდეგაც ფედერაციას ახალი სტრატეგიის შემუშავება მოუწევს, რათა მედიაყურადღებისა და მსხვილი სპონსორების დაკარგვა აირიდოს.
ექსპერტები აღნიშნავენ, რომ ალ-ნასრის თავდამსხმელის გავლენა ფეხბურთის საზღვრებს სცდება და იგი მსოფლიოში ყველაზე პოპულარული ინფლუენსერია. პორტუგალიის ფედერაციას მოუწევს ისეთი იდენტობის შექმნა, რომელიც მხოლოდ ერთ ადამიანზე არ იქნება დამოკიდებული, თუმცა რონალდუს წასვლის შემდეგ მიღებული დარტყმის შემსუბუქება იოლი არ იქნება.
