ქოქრილი წავიდა - რაგბის ნაკრების მწვრთნელობის კიდევ ერთი კანდიდატი ცნობილია

რიჩარდ ქოქრილი, 2-წლიანი თანამშრომლობის შემდეგ, საქართველოს ნაკრებისა და შავი ლომის მთავარი მწვრთნელის პოსტებს ტოვებს.

ავტორიტეტული სარაგბო გამოცემა Rugbyrama 5 დეკემბერს წერდა, რომ რაგბის კავშირი ერთ-ერთ მთავარ კანდიდატად ფრანგული ბრივის დამრიგებელ პიერ-ანრი ბრონკანს განიხილავდა.

ბრონკანს, საქართველოს ნაკრების შესახებ, ხუთშაბათს პრესკონფერენციისას კითხეს: "საქართველოსთან შეთანხმებული არაფერია. დაზუსტებით გეტყვით, რომ 2027 წლის მსოფლიო თასზე ყოფნა ჩემი სურვილია, ვისთან ერთად ვიქნები, ამას ვნახავთ". თუმცა, L'Equipe-ის ცნობით, უიქენდზე გამოკვეთილი სიტუაციით, ბრონკანის ბორჯღალოსნების მწვრთნელად დანიშვნის შანსები მინიმუმამდეა შემცირებული.

სამაგიეროდ, გავლენიანი გამოცემა, ბრონკანის შემდეგ, ახალ კანდიდატურას ასახელებს - ფრანკ აზემა, რომელიც ოქტომბრის ბოლოს პერპინიანის დატოვების შემდეგ თავისუფალია.

როგორც L'Equipe აღნიშნავს, აზემასთან კონტაქტი უკვე დამყარდა, მოლაპარაკებებს კი ჯერ მიმდინარე სახე აქვს და დასკვნების გაკეთება ამ ეტაპზე მიზანშეწონილი არაა.

შეგახსენებთ, რიჩარდ ქოქრილი ნაკრებს 2024 წლის იანვრიდან ხელმძღვანელობდა და მას შემდეგ ჩატარებული 22 მატჩიდან 14 მოაგებინა.

54 წლის ინგლისელის თავკაცობით, საქართველოს ნაკრებმა რაგბი ევროპის ჩემპიონატი 2-ჯერ მოიგო (2024 და 2025 წლებში) და მოიპოვა 2027 წლის ავსტრალიის მსოფლიო თასის საგზური.