ფორმულა 1-ის 2025 წლის სეზონი კულმინაციას მიუახლოვდა.
სეზონის ბოლო გრან პრი აბუ დაბიში გაიმართება, სადაც ჩემპიონის ვინაობაც გაირკვევა. ტიტულისთვის კი ერთდროულად 3 მრბოლელი იბრძოლებს - ლანდო ნორისი, მაქს ვერსტაპენი და ოსკარ პიასტრი.
ბოლო რბოლის წინ პილოტების ქულები ასე გამოიყურება.
ლანდო ნორისი - 408 ქულა
მაქს ვერსტაპენი - 396 ქულა
ლანდო ნორისი - 392 ქულა
საინტერესოა, ვის როგორი სცენარი აწყობს იმისთვის, რომ ჩემპიონი გახდეს.
ლანდო ნორისი
მაკლარენის ბრიტანელი პილოტი აბუ დაბის რბოლაში პირველ, მეორე და მესამე ადგილებზე გასვლის შემთხვევაში ავტომატურად გახდება ჩემპიონი და არ იქნება კონკურენტების პოზიციაზე დამოკიდებული.
თუ ლანდო მე-4 ან მე-5 პოზიციაზე გავა, მაშინ ვერსტაპენმა რბოლა არ უნდა მოიგოს, პიასტრის პოზიციას კი მნიშვნელობა არ ექნება.
თუ ნორისმა მე-6 ან მე-7 ადგილი დაიკავა, მაშინ არც ვერსტაპენმა და არც პიასტრიმ რბოლა არ უნდა მოიგონ.
ბრიტანელი მე-8 პოზიციის დაკავების შემთხვევაში ჩემპიონი მაშინ გახდება, თუ მაქსი პირველ და მეორე ადგილზე არ გავა, ოსკარი კი რბოლას ვერ მოიგებს.
თუ ლანდო მე-9 ადგილზე გავა, მაქსი სამეულს მიღმა უნდა დარჩეს, ავსტრალიელმა კი რბოლა ვერ მოიგოს.
და ბოლო შემთხვევა, თუ ნორისი მე-10 ადგილზე გავა ან ათეულს მიღმა დარჩება, მისი ჩემპიონობისთვის ვერსტაპენი სამეულს მიღმა უნდა დარჩეს, პიასტრი კი პირველ და მეორე ადგილზე არ უნდა გავიდეს.
მაქს ვერსტაპენი
რედ ბულის ნიდერლანდელ პილოტს და ფორმულა 1-ის ოთხგზის ჩემპიონს ბევრად შეზღუდული რაოდენობის სცენარი აქვს.
მაქსი რბოლის მოგების შემთხვევაში ჩემპიონი მაშინ გახდება, თუ ნორისი სამეულს მიღმა დარჩება, პიასტრის შედეგს კი მნიშვნელობა არ ექნება.
თუ ვერსტაპენი მე-2 ადგილზე გავა, მაშინ ლანდომ მე-8 ან უფრო დაბალი პოზიცია უნდა დაიკავოს, ოსკარი კი პირველ და მეორე ადგილზე არ უნდა გავიდეს.
თუ მაქსმა მე-3 ადგილი დაიკავა, ჩემპიონი მაშინ გახდება, თუ ნორისი მე-9 ან უფრო დაბალ პოზიციაზე გავა, პიასტრი კი რბოლას ვერ მოიგებს.
ოსკარ პიასტრი
ჩემპიონობისთვის მებრძოლ სამეულში ყველაზე ნაკლები შანსი მაკლარენის ავსტრალიელ პილოტს აქვს, თუმცა შანსი მაინც არსებობს.
პიასტრი რბოლის მოგების შემთხვევაში ჩემპიონი მაშინ გახდება, თუ ლანდო ნორისი ხუთეულს მიღმა დარჩება, ვერსტაპენის პოზიციას კი მნიშვნელობა არ ექნება.
მეორე ადგილზე გასვლის შემთხვევაში კი ოსკარს შანსი მხოლოდ მაშინ ექნება, თუ ნორისი მე-10 ან უფრო დაბალ პოზიციას დაიკავებს, მაქსი კი სამეულში ვერ გავა.
ტრიუმფის შემთხვევაში ლანდო ნორისი და ოსკარ პიასტრი ჩემპიონები პირველად გახდებიან, მაქს ვერსტაპენი კი ზედიზედ მე-5 ტიტულისთვის იბრძვის.
აბუ დაბის გრან პრი 5-7 დეკემბერს გაიმართება, გადამწყვეტი რბოლა კი 7 დეკემბერს 17:00 საათზე დაიწყება.
