ფორმულა 1-ში კატარის გრან პრი გაიმართა.
ლუსაილის ტრასაზე რბოლა საკმაოდ დაძაბული გამოდგა. რბოლის სტარტზე პირველ მოსახვევში მაქს ვერსტაპენმა ლანდო ნორისს პოზიცია მოუგო და მე-2 ადგილზე გადაინაცვლა, ამის შემდეგ ინციდენტი მოხდა, რომლის გამოც ტრასაზე უსაფრთხოების მანქანა გამოვიდა.
აღნიშნულით რედ ბულმა ისარგებლა და მაქსი პიტ სტოპზე შეიყვანა, მაკლარენის მრბოლელები კი ტრასაზე დარჩნენ და ეს შესაძლებლობა არ გამოიყენეს, შესაბამისად რბოლის დარჩენილ ნაწილში ნიდერლანდელს ერთით ნაკლები პიტ სტოპი ჰქონდა დარჩენილი.
საბოლოოდ ამ სტრატეგიამ იმოქმედა და ვერსტაპენმა რბოლა დამაჯერებლად მოიგო, მეორე ადგილი ოსკარ პიასტრიმ დაიკავა, მე-3 ადგილზე კი მოულოდნელად კარლოს საინსი ავიდა, რომელმაც ხელი ლანდო ნორისს შეუშალა, რომ პოდიუმზე ასულიყო.
კატარის გრან პრიზე ქულები ასე განაწილდა:
1. მაქს ვერსტაპენი (რედ ბული) - 25 ქულა
2. ოსკარ პიასტრი (მაკლარენი) - 18 ქულა
3. კარლოს საინსი (უილიამსი) - 15 ქულა
4. ლანდო ნორისი (მაკლარენი) - 12 ქულა
5. კიმი ანტონელი (მერსედესი) - 10 ქულა
6. ჯორჯ რასელი (მერსედესი) - 8 ქულა
7. ფერნანდო ალონსო (ასტონ მარტინი) - 6 ქულა
8. შარლ ლეკლერი (ფერარი) - 4 ქულა
9. ლიამ ლოუსონი (რეისინგ ბულსი) - 2 ქულა
10. იუკი ცუნოდა (რედ ბული) - 1 ქულა
კატარული რბოლის შემდეგ ჩემპიონატში ვითარება კიდევ უფრო დაიძაბა და შედეგად 2025 წლის სეზონის ჩემპიონს ბოლო გრან პრიზე, აბუ დაბიში გავიგებთ. ლანდო ნორისის უპირატესობა მაქსთან 12 ქულაა, თანაგუნდელ პიასტრისთან კი - 16.
1. ლანდო ნორისი - 408 ქულა
2. მაქს ვერსტაპენი - 396 ქულა
3. ოსკარ პიასტრი - 392 ქულა
აბუ დაბის გრან პრი 5-7 დეკემბერს გაიმართება.
