"ყველაფრისთვის მზად ვარ" - დოლიძე ერნანდესთან ბრძოლაზე

რომან დოლიძემ საბრძოლო კვირაში UFC-სთან ინტერვიუ ჩაწერა.

ქართველმა მებრძოლმა ხუთრაუნდიანი ბრძოლის მნიშვნელობაზე ისაუბრა.

"ვიღებ თუ არა სიამოვნებას დამატებითი რაუნდებით? ასე არაა, ყოველთვის ვცდილობ, რომ ბრძოლა მალე დავასრულო, თუმცა, რა თქმა უნდა, მთავარი ღონისძიების მონაწილეობა მომწონს, რადგან აქ ამის გამო ვართ და ამისთვის ვმუშაობთ. თუ მეინ ივენთებზე ხარ, ესე იგი კარგად მუშაობ."

დოლიძემ ვეტორისთან აღებულ რევანშზეც გააკეთა კომენტარი.

"მარვინთან მარცხის შემდეგ გამარჯვების დაბრუნებაზე არ ვფიქრობდი, რადგან ჩემთვის ბრძოლა ბრძოლაა, თუმცა მიხარია, რომ ყველას პასუხი გავეცი."

რომანმა მის მომავალ მეტოქე ენტონი ერნანდესზეც ისაუბრა.

"ის კარგი მებრძოლი და ათლეტია, მას შვიდმოგებიანი სერია აქვს და კარგ მეტოქეებს შეხვდა, თუმცა ეს ჩემთვის მორიგი ბრძოლაა და მე ყველაფრისთვის მზად ვარ.

მას წნეხი და ძირს ჩაყვანა უყვარს, თუმცა მას ისეთი არაფერი აქვს, რისთვისაც მზად არ ვარ. მე გრეპლერი ვარ, UFC-ში საბმიშენით მოგება არ მაქვს, მაგრამ ვინ იცის, ეს პირველი იყოს."

ქართველმა თავის სატიტულო ბრძოლის შანსებზე დააფიქსირა აზრი.

"ჩვენ ვსაუბრობთ, რა არის სამართლიანი და ვფიქრობ, რომ მე ძალიან ახლოს ვარ და ასეც უნდა იყოს, მაგრამ თუ რეიტინგზე ვისაუბრებთ, მე არც ისე ახლოს ვიმყოფები, თუმცა ვფიქრობ, რომ ამ ბრძოლის შემდეგ ვიმსახურებ ისეთ ბრძოლას, რომელიც სატიტულო შანსთან მიმაახლოვებს."

რომან დოლიძე ენტონი ერნანდესს 10 აგვისტოს დაუპირისპირდება. UFC Vegas 109-ის მეინ ქარდი 03:00 საათზე დაიწყება.

რომან დოლიძე - ფავორიტების ფინიშერი