ბარსელონას პრეზიდენტი, ჟოან ლაპორტა, დარწმუნებულია, რომ კლუბის მშენებარე არენა ევროპული ფეხბურთის ახალი ცენტრი გახდება.
სტადიონის რეკონსტრუქცია 2023 წელს დაიწყო და მიუხედავად იმისა, რომ სამუშაოები ჯერ კიდევ გრძელდება, 2025 წლის ნოემბრიდან გუნდი მშობლიურ მოედანს დაუბრუნდა.
კლუბის პრეზიდენტმა სტადიონის მომავალზე, მის ტევადობასა და იმ დიდ ფინალებზე ისაუბრა, რომელთა მასპინძლობაც ბარსას სურს:
„ჩვენ წარმოუდგენელ სიამაყეს ვგრძნობთ. ეს იქნება საუკეთესო სტადიონი ევროპაში. ყველაზე დიდი — თითქმის 105 ათასი ადგილით. კომფორტული, უსაფრთხო და კომერციულად მიმზიდველი.
ჩვენ გვსურს, რომ აქ დიდი ფინალები გაიმართოს. ძალიან გვინდა, რომ 2029 წლის ჩემპიონთა ლიგის ფინალს სწორედ „კამპ ნოუმ“ უმასპინძლოს, რომელიც იმ დროისთვის სრულად იქნება დასრულებული და ნამდვილ საჩუქრად იქცევა.
ასევე, შესანიშნავი იქნებოდა 2030 წლის მსოფლიო ჩემპიონატის ფინალის სწორედ აქ ჩატარება. როდესაც სახლში საბოლოოდ დავბრუნდებით, ეს იქნება საუკეთესო სტადიონი მსოფლიოში,“ — განაცხადა ლაპორტამ.
ბარსელონას ხელმძღვანელობის გეგმით, სტადიონი არა მხოლოდ სპორტული ობიექტი, არამედ კლუბის ეკონომიკური აღორძინების მთავარი წყაროც უნდა გახდეს.
