რა თქვეს ფეხბურთელებმა წაგებული მატჩის შემდეგ და რას უნდა ველოდოთ ბელფასტში

საქართველოს ეროვნული ნაკრები სტუმრად 0:1 დამარცხდა.

მატჩის დასრულების შემდეგ ქართველმა ფეხბურთელებმა: ლაშა დვალმა, გიორგი მამარდაშვილმა, საბა გოგლიჩიძემ და გიორგი კვერნაძემ შეხვედრა შეაფასეს და არსებულ ვითარებაზე ისაუბრეს.

ლაშა დვალის თქმით, გუნდმა თამაში მძიმედ დაიწყო და სასურველი შედეგის მიღწევა ვერ მოახერხა. ის მიიჩნევს, რომ ახლა პრობლემა საკუთარ თავში უნდა ეძებონ და აუცილებლად დაიბრუნონ ის ენერგია და შემართება, რაც ევროპის ჩემპიონატზე ჰქონდათ.

გიორგი მამარდაშვილმა აღნიშნა, რომ გასვლაზე თამაში ყოველთვის ურთულესია. მისი თქმით, ბიჭებმა მაქსიმუმი გააკეთეს და მომენტებიც შექმნეს, თუმცა გოლის გატანა ვერ მოხერხდა. მიუხედავად ამისა, მეკარეს გუნდის პოტენციალის და იმის სჯერა, რომ ნებისმიერ მეტოქესთან წარმატების მიღწევა შეუძლიათ.

საბა გოგლიჩიძემ რთულ პერიოდზე გაამახვილა ყურადღება და დაამატა, რომ ფეხბურთში მსგავსი რამ ხდება, თუმცა ეს დროებითია და ყველაფერს გამოასწორებენ.

გიორგი კვერნაძემ კი გულშემატკივრებს, რომლებიც გუნდს მუდმივად გვერდში უდგანან, განსაკუთრებული მადლობა გადაუხადა.

ცნობისთვის, საქართველოს ნაკრები მომდევნო მატჩს ბელფასტში, ჩრდილოეთ ირლანდიის წინააღმდეგ გამართავს. შეხვედრა თბილისის დროით 22:45 საათზე დაიწყება.