საქართველოს ნაკრებმა ბუდაპეშტში მდებარე პუშკაშ არენაზე უნგრეთის წინააღმდეგ ითამაშა და სამწუხაროდ 0:1 დამარცხდა. ერთა ლიგის სამი ტურის შემდეგ ჩვენი გუნდი მხოლოდ ერთი ქულით ბოლო პოზიციას იკავებს.
შეხვედრაში მასპინძლები შესამჩნევ უპირატესობას ფლობდნენ, რაც სტატისტიკასა და მოთამაშეების ქულებზეც აისახა. WhoScored ის ვერსიით მატჩის საუკეთესო ფეხბურთელად დომინიკ სობოსლაი დასახელდა 9.41 ქულით. ლივერპულის ვარსკვლავმა დაცვასა და შეტევაში ერთნაირად იაქტიურა, მამარდაშვილის კარში 5 ჯერ დაარტყა, 8 პოტენციური საგოლე გადაცემა გააკეთა და 5 დრიბლინგი წარმატებით შეასრულა. მაღალი შეფასებები დაიმსახურეს გოლის ავტორმა მილოშ კერკეზმა (7.8) და მარკ ჩინგერმაც (7.60).
რაც შეეხება საქართველოს ნაკრებს, ისევე როგორც წინა მატჩში, წაგებულთა რიგებში ახლაც საუკეთესო ხვიჩა კვარაცხელია იყო 7.69 ქულით. მან ერთი სახიფათო პასი გააკეთა, 4 დრიბლინგი შეასრულა და ერთხელ ბურთი ცარიელი კარიდანაც კი გამოიტანა. მიუხედავად ამისა, გულშემატკივრები ოქროს ბურთის ნომინანტისგან კიდევ უფრო მეტს ელიან.
7 ქულიან ზღვარს გადაცდა ლაშა დვალიც (7.40), რომელმაც ხვიჩას მსგავსად გუნდი აშკარა გოლისგან იხსნა და ბურთი კარის ხაზიდან გამოიტანა. გიორგი მამარდაშვილს 6.71 დაუწერეს, ხოლო საბა გოგლიჩიძეს 6.60.
ჩვენი ნაკრები მომდევნო შეხვედრას 5 ოქტომბერს სტუმრად, ჩრდილოეთ ირლანდიის წინააღმდეგ გამართავს, რითაც მიმდინარე სანაკრებო ფანჯარა დასრულდება.
