რეალი მსოფლიო სპორტში უპრეცედენტო ნიშნულს აღწევს

ქაოსური და უტიტულო სეზონის მიუხედავად, მადრიდის რეალი ფინანსურ ასპექტში დომინაციას აგრძელებს და ისტორიული ნიშნულის მიღწევის გზაზეა.

Deloitte-ის საფეხბურთო შემოსავლების გლობალურ რეიტინგში ზედიზედ სამი სეზონის ლიდერობის შემდეგ, რეალი მიმდინარე წელს კიდევ ერთ რეკორდულ მაჩვენებელს ელოდება. გამოცემა AS-ის ადრეული პროგნოზების მიხედვით, კლუბის მთლიანმა შემოსავალმა შესაძლოა 1.2 მილიარდ ევროს გადააჭარბოს, რაც სრულიად ახალი ორიენტირი იქნება მსოფლიო სპორტში.

მხოლოდ გასულ სეზონში ბლანკოსმა რეკორდული 1.161 მილიარდი ევროს შემოსავალი მიიღო, რითაც ისტორიაში მეორედ გადააბიჯა 1-მილიარდიან ბარიერს. ახალი შეფასებებით, ეს ციფრი კიდევ უფრო გაიზრდება, რასაც ხელს უწყობს კომერციული სექტორის უზარმაზარი ზრდა და განახლებული სანტიაგო ბერნაბეუს ეფექტი.

ამ ფინანსური ნახტომის ერთ-ერთი მთავარი მამოძრავებელი ძალა კლუბის კომერციული დეპარტამენტი გახდა.

2024/25 წლების კამპანიის განმავლობაში, რეალმა მხოლოდ კომერციული საქმიანობით 594 მილიონი ევრო გამოიმუშავა, რაც წინა მაჩვენებლებთან შედარებით შთამბეჭდავი 23%-იანი ზრდაა. ამ ზრდაში უდიდესი წვლილი შეიტანა საკლუბო ატრიბუტიკის (მერჩის) გაყიდვებმა, გლობალურმა მარკეტინგულმა სტრატეგიებმა და ახალმა სასპონსორო ხელშეკრულებებმა.

ამავდროულად, უზარმაზარ ციფრებს აჩვენებს მატჩების დღეებიდან მიღებული შემოსავალიც. 2024/25 სეზონში სტადიონთან დაკავშირებულმა შემოსავალმა 233 მილიონი ევრო შეადგინა, რაც ფეხბურთის ისტორიაში მატჩის დღის მეორე ყველაზე მაღალი მაჩვენებელია.

გარდა ამისა, მოდერნიზებული ბერნაბეუ კლუბის ფინანსურ ტრანსფორმაციას აგრძელებს, სადაც კონცერტები, ღონისძიებები და სხვადასხვა კომერციული ივენთები უკვე საერთო ბიზნესსტრატეგიის მთავარი ნაწილი გახდა.

კლუბის ფინანსური ამბიციები ამით არ ჩერდება. რეალი უკვე მუშაობს კიდევ უფრო დიდ კომერციულ გარიგებებზე მომავალი სეზონისთვის.
ესპანურმა გრანდმა Emirates-თან ხელშეკრულება 2030/31 სეზონამდე უკვე გაახანგრძლივა. ეს გარიგება ყოველწლიურად დაახლოებით 74 მილიონ ევროს გულისხმობს და ფეხბურთში ერთ-ერთ ყველაზე სარფიან შეთანხმებად რჩება.

ამავდროულად, მიმდინარეობს მოლაპარაკებები Adidas-თანაც გრძელვადიანი თანამშრომლობის გაუმჯობესებაზე. მიუხედავად იმისა, რომ მოქმედ კონტრაქტს ვადა 2029 წლამდე აქვს, ორივე მხარე დაინტერესებულია პირობების ახლავე გადახედვით.