უელსური ფეხბურთის ლეგენდამ, გარეთ ბეილმა, კარიერის განმავლობაში ნანახი საუკეთესო თანაგუნდელებისგან სიმბოლური თერთმეტეული შეადგინა.
ბუნებრივია, სიაში რეალ მადრიდის ვარსკვლავები ჭარბობენ, თუმცა ბეილმა ადგილი ტოტენჰემის ძველ მეგობრებსაც მოუძებნა.
დაცვა და მეკარე
კარს ბეილის გუნდში ტიბო კურტუა იცავს. დაცვის ხაზში კი ნამდვილი მადრიდული სიმტკიცეა: სერხიო რამოსი, რაფაელ ვარანი და მარსელო. რაც შეეხება მარჯვენა ფლანგს, აქ ბეილმა ტოტენჰემიდან კაილ უოკერი აირჩია. „მას საოცარი კარიერა აქვს და დღემდე უმაღლეს დონეზე თამაშობს“, - აღნიშნა ბეილმა. საინტერესოა, რომ მან საუკეთესოთა მიღმა ისეთი მცველები დატოვა, როგორებიც პეპე და ლედლი კინგი არიან.
ნახევარდაცვა
ნახევარდაცვის ცენტრში ბეილმა რეალ მადრიდის ლეგენდარული ტრიო დააყენა: ტონი კროოსი, კაზემირო და ლუკა მოდრიჩი. ხორვატ ვარსკვლავთან ბეილს განსაკუთრებული ურთიერთობა აკავშირებს, რადგან მასთან ერთად ჯერ ლონდონში, შემდეგ კი ესპანეთში თამაშობდა.
თავდასხმა და მთავარი სიურპრიზი
შეტევის ხაზში კრიშტიანუ რონალდუსა და კარიმ ბენზემას ყოფნა არავის გაკვირვებია, მათთან ერთად ბეილმა ფეხბურთის ისტორიაში ერთ-ერთი ყველაზე საშიში ტრიო შექმნა. თუმცა, მესამე შემტევად ბეილმა ყველასთვის მოულოდნელი არჩევანი გააკეთა და ედენ აზარი დაასახელა.
საკუთარ თავს თუ არ ჩავთვლი, აზარს ავირჩევ. ვიცი, მადრიდში საუკეთესო პერიოდი არ ჰქონია, მაგრამ მთლიანობაში ის დაუჯერებელი ფეხბურთელი იყო.
მიუხედავად იმისა, რომ ბელგიელი რეალ მადრიდის ისტორიაში ერთ-ერთ მთავარ იმედგაცრუებად ითვლება, უელსელმა აქცენტი მის კარიერულ პიკზე გააკეთა.
