საქართველოს ეროვნული ნაკრები, მსოფლიოს 2026 წლის ჩემპიონატის შესარჩევი ეტაპის ეგიდით, 11 ოქტომბერს ესპანეთს ელჩეში შეხვდება.
გუნდებს შორის ეს მე-9 ურთიერთშეხვედრა იქნება - 7 მოგება ესპანეთს და 1 საქართველოს.
ბოლო ურთიერთშეხვედრა ევრო 2024-ზე შედგა, როცა 1/8 ფინალურ ეტაპზე ლუის დე ლა ფუენტეს ბიჭებმა ჯვაროსნებს 0:1-დან 4:1 მოუგეს.
მატჩში ანგარიში კაკაბაძის ჩაწოდებისა და ლე ნორმანის ავტოგოლის შედეგად, 24-ე წუთზე, გაიხსნა. საქართველო ტაიმის მოგებასთან ახლოს იყო, თუმცა 39-ე წუთზე როდრიმ წონასწორობა დაბალი ძლიერი დარტყმით აღადგინა.
მეორე ნახევარში ესპანელებმა უკვე 3 უპასუხო გოლი გაიტანეს - ჯერ ფაბიან რუისმა შეაგდო, რის შემდეგაც თავი ნიკო უილიამსმა და დანი ოლმომაც გამოიჩინეს.
შედეგად, საქართველოს ნაკრები თავისთვის სადებიუტო ევროპის ჩემპიონატს 1/8 ფინალში გამოეთიშა, ესპანელებმა კი ტურნირის ჩემპიონობისკენ სვლა გააგრძელეს და კონტინენტის მთავარი სანაკრებო ტურნირი ისტორიაში მე-4-ედ მოიგეს.
ესპანეთისა და საქართველოს მატჩი 11 ოქტომბერს, ელჩეში, თბილისის დროით 22:45 საათიდან დაიწყება.
