ატლეტიკო მადრიდის სეზონი, რომელიც თავიდან ბევრს გვპირდებოდა, კვირას იმედგაცრუებით დასრულდა. გუნდი ვილიარეალთან 1:5 განადგურდა. ამ შედეგმა კლუბს სატურნირო ცხრილში მე-4 ადგილი არგუნა, რაც იმაზე დაბალია, ვიდრე ისინი სეზონის დასაწყისში მოელოდნენ.
ატლეტიკო ბრწყინვალე სეზონისკენ მიიწევდა, როდესაც ჩემპიონთა ლიგის ნახევარფინალს და კოპა დელ რეის ფინალს მიაღწია, თუმცა ორივე ტურნირზე მარცხის შემდეგ, ლა ლიგაში დაკავებული მე-4 ადგილი ნიშნავს, რომ მათი საბოლოო შედეგი მოლოდინს ბევრად ჩამორჩა.
მთავარმა მწვრთნელმა დიეგო სიმეონემ ლა კერამიკაზე განცდილ მარცხზე ისაუბრა და მკაფიოდ აღნიშნა, თუ სად სჭირდება გუნდს გაუმჯობესება 2026/27-ის სეზონისთვის:
ძალიან გვინდოდა მესამე ადგილზე დასრულება, მაგრამ ვერ ვაჩვენეთ ის, რაც გვსურდა. ვილიარეალი მხოლოდ ლა ლიგაში თამაშობდა, რაც საქმეს აადვილებს. ჩვენ კი ჩემპიონთა ლიგის ნახევარფინალამდე და კოპა დელ რეის ფინალამდე ვიბრძოლეთ. ამ სეზონში ზედმეტად ბევრი გოლი გავუშვით, ეს კი უმაღლეს დონეზე კონკურენციის საშუალებას არ გაძლევს.
ჩემპიონთა ლიგაზე ბევრი გოლი გაგვქონდა და სწორედ ამიტომ შევძელით შორს წასვლა. ეს ჩვენთვის გამოფხიზლების სიგნალია. თუ გვინდა, რომ მომავალ წელსაც ყველა ტურნირზე ბოლომდე ვიბრძოლოთ, მომავალი სეზონისთვის ბევრად უკეთ უნდა მოვემზადოთ.
სიმეონეს ასევე ჰკითხეს, მიაჩნია თუ არა, რომ ხულიან ალვარესმა ატლეტიკოს მაისურით უკანასკნელი მატჩი ჩაატარა. ეს კითხვა მოჰყვა გავრცელებულ ინფორმაციას იმის შესახებ, რომ არგენტინელმა თავდამსხმელმა კლუბის ხელმძღვანელებისგან ახალი კონტრაქტის შეთავაზება უარყო:
ეს კითხვა მე კი არა, ხულიანს უნდა დაუსვათ. ის საკმარისად ზრდასრულია იმისთვის, რომ იცოდეს, რის გაკეთებას აპირებს და დარწმუნებული ვარ, გადაწყვეტილება უკვე მიღებული აქვს.
