სკანდალი თურქეთში - ასობით მსაჯი ფსონების განთავსებაში გამოიჭირეს

თურქეთის ფეხბურთის ფედერაციამ აღმოაჩინა, რომ ასობით მსაჯს ტოტალიზატორების ანგარიშები ჰქონდა.

მას შემდეგ რაც გაირკვა, რომ ასობით მსაჯს სათამაშო ანგარიშები ჰქონდა, თურქეთის ფეხბურთის ფედერაცია (TFF) მათ წინააღმდეგ სადისციპლინო ღონისძიებებს დაიწყებს, -  განაცხადა ფედერაციის პრეზიდენტმა.

TFF-ის პრეზიდენტმა იბრაჰიმ ჰაჯიოსმანოღლუმ აღნიშნა, რომ ფედერაციის გამოძიებამ, რომელიც სახელმწიფო ინსტიტუტების მონაცემებზე დაყრდნობით ჩატარდა, აჩვენა, რომ თურქეთის პროფესიონალურ ლიგებში მოქმედი 571 მსაჯიდან 371-ს ჰქონდა ანგარიში, ხოლო მათგან 152 აქტიურად თამაშობდა.

„პირებს შორის, რომლებსაც ჰქონდათ სათამაშო ანგარიშები, იყვნენ შვიდი უმაღლესი დონის მსაჯი, 15 უმაღლესი დონის ასისტენტი, 36 კლასიფიცირებული მსაჯი და 94 კლასიფიცირებული ასისტენტი.“ - განაცხადა ჰაჯიოსმანოღლუმ სტამბოლში გამართულ პრესკონფერენციაზე.

მისივე თქმით, ზოგიერთმა მსაჯმა წარმოუდგენლად დიდი რაოდენობით ფსონი დადო, ერთ-ერთმა - 18,227-ჯერ, ხოლო 42 მსაჯმა 1,000-ზე მეტ მატჩზე დადო ფსონი. სხვებმა კი მხოლოდ ერთხელ გააკეთეს ეს.

ჰაჯიოსმანოღლუმ აღნიშნა, რომ ფედერაციის სადისციპლინო კომიტეტი დაუყოვნებლივ დაიწყებს მოქმედებას. „ისინი გადაეცემიან სადისციპლინო საბჭოს და დაისჯებიან ჩვენი რეგულაციების შესაბამისად,“ - აღნიშნა მან.

TFF-ის სადისციპლინო კოდექსის 57-ე მუხლის მიხედვით, მათ, ვინც ფეხბურთის მატჩებზე ფსონის დადებაში არიან მხილებულნი, შეიძლება დროებით ჩამოერთვათ უფლება იმუშაონ მსაჯებად ან მონაწილეობა მიიღონ ფეხბურთთან დაკავშირებულ საქმიანობაში სამი თვიდან ერთი წლამდე ვადით.