თურქეთის ნაკრები საკუთარ მოედანზე იტალიასთან 1:4 დამარცხდა, რასაც ბურსაში შეკრებილი გულშემატკივრების დიდი უკმაყოფილება მოჰყვა.
მეორე ტაიმის დასაწყისში, როდესაც მასპინძლები უკვე 0:3-ს აგებდნენ, თურქმა ქომაგებმა ვინჩენცო მონტელას გადადგომა მოითხოვეს.
მატჩისშემდგომ პრესკონფერენციაზე მთავარმა მწვრთნელმა თანამდებობიდან შესაძლო წასვლაზე ისაუბრა:
გადადგომა? წასვლაზე საერთოდ არ ვფიქრობ. ფეხბურთელების მხარდაჭერას ვგრძნობ და წასვლაზე არც მაშინ მიფიქრია, როდესაც რამდენიმე საინტერესო შეთავაზება მივიღე. აქამდე ერთად მოვედით და მოტივირებული ვარ, რომ მუშაობა გავაგრძელო.
მონტელამ გულშემატკივრების რეაქციაც გააკრიტიკა და საკუთარი ფეხბურთელები დაიცვა:
„სტვენა? განსაკუთრებით მტკივნეული იყო ალთაის მიმართ რეაქცია მისი შეცდომის შემდეგ. ყველანი ცოტა უფრო თავმდაბლები უნდა ვიყოთ, მეც, გუნდიც და ჩვენს გარშემო მყოფი გარემოც.
გულშემატკივრების განწყობა მესმის, მაგრამ მნიშვნელოვანია, ემოციებს ზედმეტად არ ავყვეთ. მე წონასწორობას არ ვკარგავ. ამასთან, ვამაყობ გუნდის რეაქციით, მიუხედავად იმისა, რომ ტრიბუნები მათ წინააღმდეგ იყვნენ.“
Sky-სთან საუბრისას მონტელამ დაამატა:
ამ ბიჭებს ეს არ დაუმსახურებიათ იმის გათვალისწინებით, რაც ბოლო 3 წლის განმავლობაში აჩვენეს.
იტალიასთან მარცხის მიზეზებზე საუბრისას თურქეთის ნაკრების მწვრთნელმა აღნიშნა:
„პირველი ნახევარი საათი უნდა დავივიწყოთ. ასეთ დონეზე ყოველ 3 დღეში ერთხელ თამაში გამოცდილებასა და მიჩვევას მოითხოვს, რაც ჩვენ არ გვაქვს.
საქმე როგორც მენტალურ, ისე ფიზიკურ აღდგენას ეხება. მეტოქე მატჩს უკეთ მიუდგა, ჩვენ კი კოორდინირებულად ვერ ვმოძრაობდით და თავდაჯერება დავკარგეთ.“
VIDEO: მანჩინის პირველი მოგება დაბრუნების შემდეგ - მონტელა მშობლიურ ნაკრებთან განადგურდა
